Serchhip District-ah Zirlai naupangte hnenah a thlawnin Zirlaibu semchhuah mek a ni

Samagra Shiksha Serchhip District-a thawktute chuan kumin-a Zirlai naupangte hnena zirlaibu a thlawna an sem tur zinga a tam zawk chu an sem tawh thu sawiin, tunah hian sem tur engemaw zat an la kawl thu leh lehkhabu la rawn thleng lo pahnih ala awm thu an sawi.

Elementary School zirlai naupangte hnena sawrkar in a thlawna zirlaibu a sem thin chu kumin ah pawh kalpui leh niin Serchhip District-a semchhuah tur pawh tun thla ni 8 atang khan pekchhuah tan a ni a, Serchhip DEO leh Samagra Shiksha-a DPC Lawmawma chuan Serchhip District-a sem tur zirlaibu te hi a vailiam a, tun thla ni 8 khan Serchhip khawpui chhunga School hrang hrangte tan Zirlaibu hi pekchhuah niin April 9-ah Hmuntha, Lungpho leh Sailulak-ah semchhuah leh a ni a, a bak zawng hi tun thla ni 10 khan semchhuah a ni.

Sawrkar in ruahmanna a siam angin Zirlaibu hi Primary School-ah zirlai pakhat tan Rs. 250/- man zel leh Upper Primary School, Middle School-a Zirlai pakhat tan Rs. 400/- man zel sem tur a ni a, Sawrkar enkawl, Govt. School leh Govt. Aided School-a zirlai naupangte hnenah sem tura ruahman niin Serchhip District pumah hian Govt. Primary School-ah hian zirlai naupang 1931 awm anga chhinchhiah a ni a, Middle School bikah Govt. School leh Govt. Aided School-a Zirlai 2694 awm anga chhut niin a vaiin zirlai naupang 4625 te hnenah kumin hian Zirlaibu hi a thlawna sem tura ruahman a ni.

Samagra Shiksha-a thawktute chuan a tirah Zirlaibu hi a rawn thleng kim nghal lo tih LENKAWL hrilhin a tam zawk erawh a rawn thlen nghal thu leh heng te hi a tum khatna ah an pekchhuah thu an sawi a, lehkhabu an pekchhuah hnu hian engemaw zat rawn thleng awm lehin Inthlanpui avanga an la semchhuah loh thu leh Vote thlak zawhfel a nih chuan sem leh nghal tur a nih thu an sawi a. Zirlaibu thenkhat zirlai daih kim lo deuh te la awm bawk mah se tun thlenga la rawn thleng lo hrim hrim erawh Zirlaibu pahnih chiah a awm thu an sawi a ni.

Sawrkar in ruahmanna a siam ang chuan pawl khat zirlaite tan Zirlaibu semchhuah tur hi panga awmin pawl hnih zirlaite hnenah pali semchhuah a ni anga. Pawl thum zirlaite hnenah Zirlaibu 6 sem tur niin a vaiin semchhuah a ni tawh a, pawl li zirlaite hnenah zirlai 6 leh pawl 5 zirlaite hnenah 7 sem tur niin semchhuah kim a ni tawh bawk a, Pawl 6 zirlaite hnenah Zirlaibu 10 semchhuah tur awmin pawl 7 zirlaite hnenah 10 leh pawl 8 zirlaite hnenah 10 bawk semchhuah tur a ni a, harsatna dang a awm loh chuan semchhuah leh thuai a nih tur thu an sawi a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result