MP inthlanah mipuiin ZPM vote kan ba lo - MNF

MNF Party chuan, “Thla li chuang hlek enchhin tawhah ZPM sawrkar kalphung a lang chiang tawh a, MP inthlana vote zui zel hi mipui in kan ba tawh lo a ni,” an ti.

Inrinni-a Aizawl Press Club-a thuthar thehdarhtute an kawmna ah MNF Publicity Board Vice Chairman J.Malsawmzuala Vanchhawng chuan kan hma lawka Lok Sabha MP inthlan lo awm turah hian ZPM chuan ‘kan ram, kan hnam leh kan sakhua’ himna tura thawh hlawk tur lam aiin sum haichhuah dan thiam an dap zawk nia a lan thu sawiin, “Dec. 8, 2023-a Chief Minister-in ni 100 chhunga an hmalakna tur a puan zinga inrenchem an tum thu a sawi pawh an hmalak dan enin inrenchem lam an hawi zui ta miah lo a ni,” a ti a. ZPM sawrkarah Chief Minister Office chu thiltithei takah dah a ni tih sawiin, “Budget-a hmathar lakna tur tarlan, capital outlay cheng vbc. 1,953.75 atangin CM chan, Finance-ah vbc. 1,219.70 dah a ni a, hei hi 62% aia tam a ni a. CM kutah engkim a awm ta vek tihna a ni,” a ti a. An Candidate K. Vanlalvena Vote theuh turin mipuite chu an ngen bawk a ni.