LMC huamchhungah Job Card 14,000 paih a ni dawn

Lunglei khawpui chhung inenkawlna chu Municipal Council hnuaia a awm tak avangin Lunglei RD Block hnuaia awm zinga Lunglei Municipal Council in a huam chin khaw hrang hranga MGNREGS Job Card nei mi 14,200 te chu paih an ni dawn.

Rural Development Department Secretary in hemi chungchanga hriattirna a chhuah angin LMC hnuaia Job Card nei te tan ni 100 inhlawhna chu April ni 1 atang khan a tawp dawn a. Hetihlai hian a tawp nan kar hmasa lam khan Job Card neitu, Bank-a Mapping ti te Account ah pawisa thun a ni a, héi hi January, February leh March thla hlawh niin Rs. 6225/- a ni a, Mapping ti ve lo te erawhin farewell NREGS hlawh tia sawi, Rs. 6225/- hi an dawng ve thei lova, BDO Office-ah thil awm dan zawtfiahin mi engemawzat chu an buai hle a ni.

Mapping hi Aadhar Card leh Bank account thlunzawmna niin Aadhar Card neilo leh Bank a thlunzawm ve lo te chuan pawisa hi an dawng ve thei lova, hei hi nikum lam khan Office-a thawk te chuan Gram Sabha-ah te pawh an lo sawi tawh thin a, ngai pawimawh an awm laiin ngai pawimawh ve lo leh a nachang hre ve lo te chuan harsatna hi an tawk ta ah an ngai tih an sawi. 

Lunglei RD Block-a Job Card 18,900 atangin LMC area bikah Job Card 14200 vel paih an nih tak avang hian NREGS hnuaia an sum hmuh thin, Material component leh Administrative cost belhkhawm chu Rs. 75,54,40,000/- vel ni a chhut a ni a, Ni za inhlawhna hi chhungkaw tam tak chuan Quota khul nan, dawr baah te leh naupang School Fee atana innghah nan an hmang a, miharsa zawk te an mangang lawk in an huphurh hle tih Lunglei-a AIR Correspondent chuan a sawi a. Zobawk lamah phei chuan LMC atanga talchhuah leh dan tur an ngaihtuah mek a, Veng thenkhatah NREGS atanga bawlhhlawh paihna thawhkhawm an awm avangin bawlhhlawh paih ringawt pawh harsatna tawk an awm dawn ni a thudawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man