Lok Sabha Inthlanpui tluang taka neih theih nan Mizoram Police ten theihtawp an chhuah mek zel

Mizoram Lok Sabha Inthlanpui neih turah mipui ten tluang taka Vote an thlak theih nan Mizoram Police ten theihtawp chhuaha inbuatsaihna an kalpui chu Mizoram DGP Anil Shukla chuan a sawi.

Nimin-a DGP Conference Hall, PHQ-a thuthar lakhawmtute a kawmna ah DGP Anil Shukla chuan Election Model Code of Conduct (MCC) khauh taka kenkawh a nih thu leh Static Survellance Team (SST) 81 leh Flying Squad (FS) Team 83 an ruat thu a sawi a, an chetvelna te Election Commission of India hnenah nitin an report thìn thu a sawi a. Lok Sabha Inthlanpui neih turah hian Mizoram chhungah Polling Station 1280 a awm thu te, chung zinga 19 chu Critical Polling Station an nih bakah heng Critical Polling Station-ah hian venhimna uluk lehzuala kalpui a nih thu a sawi a, Mizoram Police Radio Organisation (MPRO) lam chuan biakhlatna hmanrua an dah vek thu te, Expenditure Sensitive Polling Station 2 a awm thu leh heng bakah hian Mizoram Police chuan Mizoram ramri dep-ah Inter-State Border Check Post hmun 12-a an siam thu te bakah Mizoram chhungah pawh Intra-State Check post 40 an siam thu sawiin, Inthlanna felfai leh ralmuang a awm theih nan venghimtu CAPF Company 12 bakah State Police 4600 hmun hrang hrangah dah an nih tih a sawi bawk.

DGP chuan ruihhlo leh a kaihhnawih man chungchangah Mizoram Police-te chuan an theihtawp an chhuah thu sawiin, kumin January ni 1 atanga nimin thleng khan ND&PS hnuaiah thubuai 106 ziahluh a nih thu te, hemi kaihhnawih ah mi 134 an man thute bakah Heroin kg. 50.85 manin cheng Rs. 756,39, 662/- hu a nih thu te, Ganja kg 15.95 manin Rs. 1,33,750/- hu a nih thu leh Methampatamine kg. 27.277 manin Rs.354,60,100/- hu a nih thu te a sawi a. Zu leh a kaihhnawih pawh Rs. 2,89,66,210/- hu man a nih tawh thu a sawi a. Ralthuam leh a kaihnawih avangin thubuai 15 siam a nih thu leh hemi chungchangah mi 25 an man thu te, ralthuam 15 leh silai mu 3139 bakah Gelatine Bomb box 203 an man thu sawiin, ruihhlo lah ralthuam an man zinga tam tak chu Inthlan puan a niha MCC kenkawh hnua man a nih thu a sawi bawk a ni.

DGP Anil Shukla chuan Mizoram State thenawm Assam, Tripura leh Manipur-a Mizoram hnaih SP leh OC te chu Mizoram damri dep District SP leh OC ten vawi 20 chuang Lok Sabha inthlanpui tluang taka neih a nih theih nan an biakpawh tawh thu leh inthlanpui neih hma ni, April ni 18-ah Assam, Tripura leh Manipur ramri te chu mipuite tana harsatna siam lova Mizoram kaltlang theih lova khar a nih tur thu a sawi bawk.