Kan luitui a thianghlim zawk nan bawlhhlawh sawngbawl dan ah hmasawn a tul - PHE Minister

PHE Department changtu Minister Prof. Lalnilawma chuan kan lui tui a lo thianghlim zawk theih nan bawlhhlawh kan sawngbawl dan ah hma kan sawn a ngai tih a sawi.

ZPM in nimin-a Aizawl-a an Office-a Chhung Inkhawm an neih ah Prof. Lalnilawma chuan tunlai hian Mizoram hmun hrang hrangah tui harsatna kan tawk mek tih sawiin, hemi sukiang tur hian theihtawp an chhuah thu leh Department lam pawh an hah thin hle tih a sawi a. “Kan lui tui tlante kan duat a ngai a, tunlaiin mi thahnemngai ten kan luidungte thian faiin an hnatlang thin a, mipuite pawh kan bawlhhlawh paih danah fimkhur lehzual kan ngai a ni. Tui hi kan nunna hnar a ni a, kan luite a lo thianghlim zawk nan bawlhhlawh kan sawngbawl danah pawh hian mipui ten hma kan sawn a ngai takzet ta a ni,” a ti.

ZPM sawrkar hnuaiah hna a tha tur a ni tih pawh PHE changtu Minister chuan sawiin, “Kan hnathawh a tha tawk lo a ni pawhin mipuiten min sawisel tur a ni. Kan in en let anga, kan siam tha leh tur a ni. A tha zawnga in sawisel hi chu mi tupawhin kan pawm thiam vek a ni,” a ti a. Tunhnaiah an party mi leh sa thenkhatin hna an thawk ve tih sawiin, “Mi thenkhatin Departmental Work-ah Work Supervisor an ruat ti ang zawng ten min sawisel a, min sawiseitu te hian an lo tih dan vek a ni, a thawktu ni lovin an hna thawh hi kan en zawk tur a ni a, a tha lo a nih chuan kan sawisel mai tur a ni. Politics a nih avanga thudik chanve hmanga in beih te hi tawp se la, kan ram leh hnam tana tha turah chuan inlungrual takin hna thawh ho puiah Opposition lam pawh ka sawm duh a ni,” a ti.

Pathian leh mipui te khawngaihna zara Minister dinhmun a luah hnuah an thil hriat tam ber chu ‘mamawh kan lo va ngah tak em’ tih a ni tih pawh Prof. Lalnilawma chuan sawiin, “Nitin maiin dilna a lo lut reng a, hei leh chen kan ram inrelbawlna kan lo kalpui tawh a, mipuiten mamawh kan la ngah em em mai hi eng nge a chhan tih hi ka zawhna a ni,” a ti a. “Mamawh zawng zawng erawh in pek vek a harsa ang, mipui nawlpuiin kan nitin khawsakna leh kan eizawnna kawnga kan mamawhte a tam thei ang ber in phuhruksak hi sawrkar mawhphurhna a ni a, mipui te tana theihtawp chhuah hi kan tih tur dik tak a ni. Khawtlang hruaitu leh khaw tual mi ten khawtlang hmasawnna tur thil kan thawk a, themlem deuh mai a kan thawk thin hi chu a fel lo a, khawtlang tan chauh ni lo ram ro tling tur kan thawk a nih chuan a tha tur a ni,” a ti a. “Zoram-ah Politics thianghlim zawk kan tunnun theih nan in sawisel hmasa ngawt lovin thurawn tha zawk in pe tam ila, lehlam party an nih avang mai a sawiselna tur zawn ringawt hi a fel lova, sawrkar thawhpuitu khua leh tui tha tak ni turin mipuite kan insawm nawn leh duh a ni,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man