Vawiin tlai dar 5:00-ah Lok Sabha Inthlanpui neih tur atana Campaign theih hun a tawp dawn

Tunkar Zirtawpni, April 19, 2024-a Mizoram Lok Sabha Inthlanpui neih tur atana Campaign theih hun chu Vawiin, April 17, 2024 tlai dar 4:00 hian a tawp dawn ta a, hemi hun atanga Vote thlak zawhfel hma chuan Television (TV) emaw, Electronic Media/Social Media hmanga inthlan kaihhnawih thil tarlan leh tihchhuahte khap tlat a ni.

Hemi chungchanga nimin-a Chief Electoral Officer (CEO) Office in thuchhuah siama a tarlan danin Election Commission of India thupek angin Vawiin, April 17, 2024 tlai dar 5:00 atang hian Mizoram aiawhtu MP thlanna neih tur atana Campaign hun chu tawpin April ni 17, 2024 (Nilaini) tlai dar 5:00 atanga vote thlak ni, April 19, 2024 (Zirtawpni) tlai dar 5:00 thleng, darkar 48 chhung chu Section 126 of RP Act, 1951 sawi angin 'Silence Period' a ni a. Hemi hun chhung hian Television (TV) emaw, Electronic Media/Social Media hmanga inthlan kaihhnawih thil tarlan leh tihchhuahte khap tlat niin mi tumahin Election kaihhnawih thila mi kohkhawm leh thusawi te an ti tur a ni lo a. Inthlan kaihhnawih thil Television-ah emaw, Media dangah emaw mipui hmuh theih turin an phochhuak tur a ni lo tih a tarlang a. Election thila mipui intihhlimna, ennawm leh hlimhlawpna engmah buatsaih tur a ni lo bawk a. He thupek zawm lo te chu kum hnih (2) thleng lungin tan tir emaw, lei chawi tir emaw, a pahniha hrem theih an ni tih a tarlang bawk a. Hei bakah hian hemi hun chhung hian Candidate leh Political Party ten Press Conference leh Interview an huaihawt thiang lo a, he thupek zawm lo te chu kum hnih (2) thleng lungin tan tir emaw, lei chawitir emaw, a pahniha hrem theih an ni tih a tarlang bawk.

Hemi hun chhung hian Advertisement chhuah chungchangah pawh ECI a khauh hle a, Disclaimer (thuchhuaha mawhphurhna lak loh), thuchhuaha tu emaw hmingthatna hlawh tir (credit lines) ang chi te chu advertisement nen a kal hrang ngei ngei tur a ni tih tarlangin, Politics kaihhnawih Advertisement mai bakah Programme Sponsor-na te, Report siamte, Bulk SMS (a hlawma SMS thawnchhuah) ang chi te tih phalloh a ni a, TV leh Radio kaltlanga mipui rilru sukthlek tidanglam thei ang chi hrim hrim puanchhuah a khap a ni bawk a. Social Media platform hrang hrang- Facebook, Instagram, X (Twiter), YouTube, Whatsapp, Virtual Game Worlds etc., a Political Advertisement tichhuak duh chuan ECI emaw, State MCMC emaw in phalna an pek (pre-certified) chauh an tichhuak tur a ni tih a tarlang bawk.

CEO Office thuchhuah chuan Silence Period-ah hian aurinna hman khap tlat a nih thu leh Vantlang mike (aurinna) emaw, lirthei-a aurinna vuah a kal kual khap a nih thu pawh tarlangin, Silence Period hman a nih atangin Campaign Period a tawp a, mipuiten rilru fim tak leh ngaih-tuahna thiang an lo neih theih nana ruahman a ni tih a tarlang a. He hun hi tha taka zawm a nih theih nan Candidates leh Political Parties te pawh anmahni inthunun tura beisei an ni tih a tarlang a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result