Serchhip District-ah Lok Sabha Inthlan zawhfel a ni
Serchhip District a Lok Sabha Inthlanpui neih ah hian harsatna thleng a awm hriat a ni lo a, Zirtawpni kalta a Vote thlak-ah tlai dar 5:00 hnu lama Vote thlak ngai awm lovin Vote thlak hun khar a nih veleh Polling Party ten Serchhip DC Office pan khawm nghalin Inthlanna atana hman bungrua te an dahlut nghal a, engemaw harsatna a awm avanga thleng tlai ber Tlungvel atanga rawn haw ten zan dar 11:30-ah Receiving Counter-ah an bungrua te an thlenpui bawk a ni.
Election Commission of India duh dan leh ruahmanna siam angin Inrinni khan Serchhip DC Meeting Hall-ah Post Poll Scrutiny neih nghal a ni a, he hunah hian hian Polling Station hrang hrang te random-a thlanchhuah niin 26-Serchhip Assembly segment atangin New Serchhip III, 27-Tuikum Assembly Segment atangin Rullam leh 28-Hrangturzo Assembly Segment atangin Mual-cheng-I te thlanchhuah niin, Form 17A theuh leh Presiding Officer diary enfel a ni a, diklo leh felfai lo hmuh tur awm lovin hemi hnu hian uluk taka char that leh niin Strong Room-ah dahluh leh an ni a, venhimna tha tak hnuaiah dah niin Vote chhiar hun June ni 4, 2024-ah lakchhuah leh a ni ang.
Serchhip District Bawrhsap leh District Election Officer David Lalthantluanga chuan tun tum Lok Sabha Inthlanpui ah hian Khawl thil chhia leh khaihlak lian tham awm lovin tluang taka inthlan zawhfel a ni tih sawiin, hemi atana mawhphurhtu te zawng zawng chungah lawmthu a sawi bawk. He hunah hian Election Officer Gaston Vanlalhriatpuia leh SDO (Sadar) Rebecca Laldinmawii Hrahsel bakah Sr. Micro Observer Robert Zosangliana leh political Party aiawhte an tel a ni.
Comments
Post a Comment