Mizoram-ah Fire Service Week hman a ni

Kangmei laka himna tur inzirtirna hun, Fire Service Week chu India ram hmun dangte rualin nimin atang khan Mizoram-ah pawh hman tan a ni a, nimin khan Martyrs Day/Commemoration Day Parade hman a ni.

Kumin Fire Service Week-ah hian ‘Kangmei lakah fimkhur la, ram tan tha thawh ve rawh’ tih chu thupui-ah hman niin he Hapta chhung hian India rama Fire Service chi hrang hrangte chuan kangmei laka himna tur inzirtirna an nei dawn a, April ni 20 thleng hman a ni ang. 

Martyrs Day/Commemoration Day Parade hi Aizawl-ah chuan Fire & Emergency Services Headquarters, Hunthar Veng-ah hman a ni a. F&ES Director Zosangliana chuan thawktu zawng zawngte chu inpekna thar nen mahni a a tha ber hlan theuh turin a fuih a ni.

Martar-te sunna hunah hian kum 2023 chhunga kangthelhna leh duty kaihhnawih a thi te hming chhiar chhuakin anmahni sunna hun hman a ni a, an pual hian Martar thlanah Pangpar dah a ni bawk. Fire Service Week pual hian Fire Station tin ten Hospital/Nursing Home pakhat leh School pakhat zel kangmei chuak thulh a a him leh him loh endikna an nei dawn bawk a ni.

He Hapta pual vek hian F&ES-a thawk mi pali te chu Director General, Fire Service, Civil Defence & Home Guard Bronze Disc & Commendation Certificate dawng tura thlan an ni.