Party hrang hrang Candidate ten ngawrh takin Campaign an nei chho mek zel

Tun thla ni 19-a Mizoram Lok Sabha Inthlanpui neih tur atan Candidate hrang hrangte chuan ngawrh takin Campaign an nei chho mek zel.

ZPM Candidate Richard Vanlalhmangaiha chuan nimin khan Sihphir leh Kawnpui inkara khaw hrang hrang tlawhin Vantlang Inkhawm ah thu a sawi a, Pathian in rorelna fawng chelhtu atan ZPM a ruat mek thu leh hei hi an fel leh that bik vang a ni lo tih sawiin, “Zoram mipuite tana Pathian hun ruat lo inherchhuak a ni. Rorellai Sawrkar tha tichak tur hian MP atan rorellai party bawk an tha ber tih hi tunhma atanga thil kalphung lo awm sa a ni a, min thlang tling a nih chuan Mizoram sawrkar tan leihlawn rinawm tak ni turin ka inpe a, ka theihna leh chakna te he ram tan hian nasa lehzual zawkin ka hmang thei dawn a ni.” a ti bawk.

MNF Candidate K. Vanlalvena chuan nimin khan Aizawl Mizo Hnam Run-ah thu sawiin Lok Sabha MP atan a tling a nih chuan Ruling Party in an thawhpui duh phawt chuan an MP candidate aiin a tangkai daih zawk mai thei tih sawiin, “Tu tan pawha MP thawhpui theih nih ka tum a ni,” a ti a. “Mizo thalai eizawnna mumal nei lo thahnem tak an awm tih ka hria a. Chungte tan chuan theihtawp chhuaha hmalak ka tum a, Mizo thalai, Sports, Music, art leh thil hrang hranga talent tha tak tak nei te hian an talent hmanga ei an zawn theih dan tur theihtawpa dap pui ka tum a ni,” a ti bawk.

BJP Candidate Vanlalhmuaka pawhin nimin khan Aizawl-a an Party Office-ah thu sawiin Congress Party awmna leh Sawrkar apiangah buaina a awm thin niin a sawi a. “Mizoram hian dawt Politics kan tuipui rei ta hle mai a, hei vang hian kan State pawh hian a tuar nasa hle a, Development chhenfakawm tak hmuh tur mumal a awm loh avangin retheihna in Mizoram min tuam ta a nih hi. Chuvangin Congress Party chu Sakhua ah an buai hle a, Sakhuana hmanga Vote zawng thin an ni a, Nimahsela an thusawite belhchian dawl a awm loh avang leh anmahni ah Sakhuana in awmzia a awm chuang loh avangin tunah chuan an tuar phah ta a, India ram ah an ral mek a, Mizoram-ah pawh MLA pakhat chiah an neih phah ta a ni,” a ti bawk.

Congress Candidate Lalbiakzama chuan nimin khan Aizawl-a thuthar thehdarhtute hmaa BJP sawrkarna hnuaiah hnam tenau zawkte chu hlamchhiah an nih thu sawiin, thuthar thehdarh kawngah pawh BJP chuan thil an thup nasa hle niin a sawi a. BJP ten Lok Sabha inthlanpui a hnehna an chang a nih chuan Uniform Civil Code (UCC) hman a nih vat tur thu leh India Danpui (Constitution) chu BJP duh zawnga her danglam a nih tur thu a sawi bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result