Serchhip District-a Lok Sabha MP thlanna nei turin inbuatsaihna peihfel thawkhat a ni
Mizoram Lok Sabha Inthlanpui neih tur atana Serchhip District inbuatsaihna atan hian nimin zing dar 9:00 khan Polling Party 3rd Randomization chu neih a ni a, he hun hi Aizawl-ah he inthlanna tura Returning Officer leh Aizawl District Bawrhsap Nazuk Kumar IAS leh General Observer Dr. Nipun Vinayak te kaihhruaina hnuaiah neih niin Serchhip DC Office-a NIC Room atangin Serchhip District Bawrhsap David Lalthantluanga leh Addl. DC James Lalnithanga bakah Election Officer Gaston Vanlalhriatpuia, Sr. Micro Observer Robert Zosangliana leh Official dang ten an lo zawm a, he hunah hian 2nd Randomization-a Polling Party pakhat-a awm tur lo thlanchhuah tawh te chu an Duty-na tur Polling Station te Computer Software hmangin thliarfel a ni. Hemi hnu hian Polling Official te leh venhimna hna thawktu turte tan Govt. Serchhip College-ah Training hnuhnung ber tur neih nghal a ni bawk.
Serchhip District chhunga Polling Station 88 awm zingah ni khat-a thlen phak lohna a awm loh avangin nimin lamah Polling Party chhuak an awm lo a, Vawiin lam hian Polling Party zawng zawngte chhuak tura ruahman a ni a, Polling Party chhuak hmasa ber turte chu zing dar 8:30-ah chhuak tura ruahman niin Tuikum Bial-a Polling Station 9 leh Hrangturzo Bial-a Polling Station 8-a Duty turte an chhuak anga, Hrangturzo Bial-a Duty turte hi chawhma dar 10:30-ah chuan chhuak fel vek hman tura ruahman niin Tuikum Bial-a Duty turte pawh chawhnu dar 12:30-a chhuak kim hman tura ruahman an ni. Serchhip Bial-a Duty tur Polling Party chhuak hmasa ber turte chu chawhma dar 11:30-ah chhuak tanin a chhuak hnuhnung ber turte chawhnu dar 1:00-a chhuak fel hman tura ruahman an ni bawk a. Heng Polling Party te hian an chhuah hmain Inthlanna atana pawimawh lehkha hrang hrangte bakah Vote thlakna khawl te chu Serchhip DC Office atangin an lachhuak anga, venhimna hnuaiah enkawl zui a ni dawn a ni.
Ruahman lawk ang chuan Lok Sabha Inthlanpui neih tur atan hian mipuite chuan naktuk zing dar 7:00 atangin Polling Station hrang hrangah Vote an thlak anga, tlai dar 5:00 thleng Vote thlakna hun hi hawn tur niin Vote thlak zawhfel a nih velah lehkha pawimawh leh EVM te chu Serchhip DC Office rawn panpuiin venhimna hnuaiah dah a ni anga, June 4, 2024-a Vote chhiar hunah lakchhuah leh tur a ni ang.
Vote thlak turte hian anmahni tihchianna atan Voter ID Card (EPIC) ken tur a ni a, EPIC ken tur neilo chuan anmahni ngei an ni tihchianna an keng ngei tur a ni a, heng an ken theih zingah hian Aadhaar Card te, MGNREGA Job Card (Job Card Holder tan) te, Bank/Post Office Passbook (thlalak chuanna) te, Driving License leh Pension Document (thlalak chuanna) te chu a langsar zual niin Vote nei zawng zawngte hnena semchhuah, Voter Information Slip (VIS) chu Identification Document atan hian hman theih a ni lo a ni.
Serchhip District chhungah hian Assembly Segment pathum 26-Serchhip, 27-Tuikum leh 28-Hrangturzo te awmin Polling Station 88 a awm a, heng zingah hian hmeichhe hlang enkawl, Women Managed Polling Station 3- New Serchhip-III, Chhiahtlang-III leh Chekawn awmin Youth Managed Polling Station pakhat, Serchhip-VI leh Model Polling Station pathum- Thenzawl-III, Chhingchhip-I leh East Lung-dar-I te a awm bawk a ni.
Tarlan tawh angin Serchhip District pumah hian Vote nei thei 54,607 awmin heng zinga 414 chu Service Voters an ni.
Comments
Post a Comment