MTOA in harsatna an thlen

Mizoram Truck Owners’ Association (MT-OA) hruaitute chuan Bairabi Rel Station-a Rel lut leh chhuak mumal lo tak avanga harsatna an tawh chungchang chu nimin khan Governor Dr. Hari Babu Kambhampati hnenah an thlen a, Bairabi Railhead atanga Mizoram hmun hrang hranga buhfai dahkhawlna hmunah Buhfai phurh sak turin FCI Contractor-te hnuaiah an inhlawh tih Larsap chu hrilhin, tun dinhmunah Rel luh leh chhuah dante a mumal lo hle a. Hei vang hian MTOA hruaitute te chuan Truck neituten harsatna nasa tak an tawk mek tih Governor hnenah hian an thlen a, Bairabi Station chuan hmunhma, hmanrua leh thawktute a neih that tawk loh avangin hmun chep takah Truck tam tak inhnawhkhawm a ngai tih an sawi a. Hei vang hian a hun takah bungrua te an hlan thlak theih loh phah thin tih sawiin, he an harsatna te sutkian a nih theih nan Governor chu Railways hotute leh FCI hotute biaksak turin an ngen a ni.

Governor chuan MTOA hruaitute thu thlen leh an harsatna tawh te a ngaihthlak hnuin a tul anga hmalakpui a tum tih a sawi a, General Manager, North-East Frontier Agency (NEFA), Guwahati chu hmu tura thu rawn bawkin Recommendation letter a ziahsak nghal bawk a ni.