Serchhip District-a Home Voting-ah Vote 177 a tla

Serchhip District chhunga kum upa leh Vohbik te tana mahni In lama Vote thlak chu zawhfel niin Vote thlak thei 184 zingah mi 177 ten Vote an thlak a ni.
Serchhip DC Office atanga thu kan dawn danin Lok Sabha Inthlanpui neih turah Election Commission of India in ruahmanna a siam angin Electoral Roll-a kum 80 chunglam AVSC (Senior Citizen) leh Disability Certificate nei Vohbik, AVPD (Person with Disabilities) bakah Absentee Voters in Essential Service (AVES) te chuan mahni In lamah Vote thlak theiin tun thla ni 11 leh 12 khan heng mite hi an In-ah thawktu ten kalchilhin Vote an thlak tir a, Vote thlak thei mi 184 atangin mi 177 ten Vote hi an thlak a ni.

Tun tumah hian Serchhip District pumah AVSC hnuaia Vote thlak thei mi 132 atangin mi 129 ten Vote thlakin mi 3 in Vote an thlak lo a, AVPD-ah mi 41 ten Vote thlak theiin mi 37 in Vote an thlak bawk a, AVES hnuaiah mi 11 ten Vote thlak theiin an vaiin an thlak vek a ni.

Serchhip Bial bik-ah AVSC-a Vote thlak thei mi 80 zinga 79 ten Vote thlakin AVPD-a Vote thlak thei mi 25 zingah mi 22 in an thlak a. Tuikum Bial-ah AVSC-a Vote thlak thei mi 26 ten Vote thlak vekin AVPD-a Vote thlak thei mi 11 zinga mi 10 in Vote an thlak a, AVES-a Vote thlak thei mi pahnih ten an thlak ve ve bawk a ni. Hrangturzo Bial-ah AVSC-a Vote thlak thei mi 26 zinga mi 24 ten Vote thlakin AVPD-a Vote thlak thei mi 5 in an thlak theuh a, AVES-a Vote thlak thei mi pahnih ten Vote hi thlakin Serchhip District-a awm, District dang a Vote nei leh AVES hnuaia Vote thlak thei mi 7 ten Vote hi an thlak theuh bawk a ni.

Serchhip DC Office-a thawktute chuan mahni In lama Vote thlak thei zinga thlak lo te hi an lo boral tawh leh damdawi In a enkawl an ni tlangpui tih sawiin, Postal Ballot te hi EVM-a Vote tla te chhiar ni-a chhiar ve turin Aizawl lamah thawn a nih dawn thu LENKAWL an hrilh bawk a ni.