Nungcha kawng kan helna a boral ralna hlan a ni

Lirthei a khalh laia nungcha kawng kan lai a helna lama lirthei-a chesual leh boral zui ta Lalrinchhana (37), Kawrthah khua chu Mizoram District hrang hranga Honorary Wildlife Warden-te chuan nimin khan ralna leh chawimawina thuziak an hlan.

Lalrinchhana hi Kawrthah khua Darchhûng Motor Workshop neitu H. Lalnunsanga fapa niin Rengdil khuaah Motor chhe siam tur a awm avangin April 5, 2024 khan an ko a, chhun dar 1:00 velah Kawrthah atanga chhuakin anmahni Car-in a nu nau fapa Lalthanpuia nen Rengdil an pan a, Ramrikawn/Perngo kawn-ah kawng tha leh ngil lai takah an tlan laiin an hmaa Sanghar kawngpui kâna a lo tlan chu chil a hlauh vangin a hel a, a helna lamah tuihawk luankawr (Side drain)-ah tlalutin a motor ke pawh a chhe nghal a, an chetsual phah ta a ni.

He chetsualna ah hian Lalrinchhana hian hliam tuarin a hmu hmasatu ten bawihsawmin Kawrthah Hospital panpui nghal a ni a, hemi ni tlai dar 3:30 vel khan a boral zui ta a ni.

Hetianga nungcha tihhlum duh loh vanga nunna hial a lo chan ta hi Mizoram hmun hrang hranga District Honorary Wildlife Warden te chuan pawi an tiin amah chawimawina thuziak leh ralna sum chu nimin khan Mamit District Honorary Wildlife Warden Lalmuankima Khiangte chuan Kawrthah khua a an chenna In ah a hlan a, Kawrthah khuaa DFO Staff te leh Branch YMA hruaituten an tawiawm a ni.