Mizoram Governor in Bru Boisu a hmanpui

Bru ten an kumthar chinchhiahna atana an hman thin ‘Boisu Festival’ chu Inrinni khan Vaivakawn Cultural Centre-cum-Auditorium-ah hmangin he hun hi Governor Dr. Hari Babu Kambhampati chuan khuallian niin a hmanpui a ni.

Bru Boisu 3-na ah hian Governor chuan Bru hnam tana hun pawimawh tak, an kumthar chinchhiahna ‘Boisu Festival’ a telpui thei chu lawmawm a tih thu sawiin, Bru hnam ten harsatna tam tak an tawh chu a tawrhpui thu a sawi a. Nimahsela harsatna kara an tawrh-chhelna chu fakawm a tih thu sawiin, an kal zelna turah duhsakna a hlan bawk. Governor chuan India ram ropuina ber chu hnam hrang hrang awm mah ila kan inpumkhatna hi a ni tih sawiin, he Hnam inpumkhatna hi vawnnun zel pawimawh a tih thu a sawi a. Mitin te chu midang nunphung leh hnam zia te zahthiam a nung turin a fuih a. Hnam tinin lungrual a kan awmho a tul thu sawiin, he mi kawngah hian hma kan sawn zel a tul thu a sawi bawk. Governor chuan Bru khawtlang hruaitute chu Sawrkar laipui in Schemes hrang hrang a duan - PM Jeevan Jyoti Bima Yojana, PM Suraksha Bima Yojana te leh a dang te chu ngaihven a, mipui ten an lo hraitzau zawka nan hma la turin a fuih bawk.

Inrinni-a he hun hman ah hian thupui atan ‘Joto yak romlai ye, phaidi jati no toisa lai na’ tih chu hman niin ‘Insuihkhawmin kan khawtlang I siamtha ang u’ tihn a a ni a, he hunah hian Chakma Community leh Bodo Community aiawh te pawh an tel a ni. Boisu Festival hi Bru tana kumthar chhinchhiahna niin kumtin April 13 atanga 15-ah lawm thin a ni. He hunah hian mipa, hmeichhia, naupangte chuan zai leh lam in hun hlimawm tak an hmang thin a ni.