Serchhip-ah ruihhlo dona kawnga Kohhran thalaite nena thawhho dan tur sawihona neih a ni

Excise and Narcotics Department hmalakna in nimin khan Serchhip-ah Ruihhlo dona kawnga nasa zawka hmalak dan tur leh kawng tha zawk a awm theihna tura hmalak dan tur sawihona chu Kohhran hrang hranga thalai pawl te tan buatsaih a ni.

He sawihona Serchhip Press Club-a neih hi Serchhip District-a Asst. Commissioner of Excise and Narcotics, Malsawmkima Sailo chuan kaihruaiin Mizoram sawrkar in District hrang hrangah Kohhran thalai pawl hrang hrangte nen ruihhlo dona kawnga hmalak tlan dan tur leh thawhhona tha leh sawt zawk a awm theihna tura sawihona nei tura ruahmanna a siam anga he hun hi buatsaih a nih thu a sawi a. Inkalpawhna kawng tha zelah Serchhip khua chu chhim leh hmar, chhak leh thlang in a paltlang a nih avangin kan hriat loh karah pawh dan phalloh thil hian min paltlang fo a rinawm thu a sawi a. Hei vang hian inring reng a kan awm a tul thu leh thawhhona tha zawk te nen ruihhlo dona kawnga hmalak tlan a tul thu a sawi bawk.


He hunah hian END Serchhip Station-a Officer In-charge Lalsangzuala Pachuau chuan sawihona sawi hawnna neiin ruihhlo leh a kaihhnawih avanga kan ram natna chu hai der theih a ni lo tih sawiin, YMA leh tlawmngai pawl dangah te ruihhlo that loh zia leh a dona kawnga hmalak dan tur inzirtirna neih ni fo mah se Kohhran huang ah erawh an la neih tam loh thu a sawi a. Ruihhlo avanga harsatna tawk thalaite hi eng Kohhran ah emaw Member an nih ve tho avangin Pathian lama kaihhruai an nih theih nan inzirtirna kan neih uar zel a tul thu a sawi a. Mizoram-ah tunhnaiah ruihhlo a hluar thu leh Myanmar atanga raltlan rawn lut zingah pawh ruihhlo rawn kenglut te an awm tak thu sawiin, Mizoram-ah ruihhlo a hluar phah thu leh END Serchhip Station pawhin nikum chhung khan Heroin kg. 3 chuang an man thu a sawi bawk a ni.

Ruihhlo dona kawnga thawhho dan tur sawihona hunah hian Serchhip-a Kohhran hrang hrang Thalai pawl te tel tura sawm niin Presbyterian Kohhran, Baptist Church of Mizoram, UPC (NEI), Roman Catholic leh Isua Krista Kohhran (IKK) atangin Kohhran thalai pawl aiawh te an tel a, kan ramah ruihhlo a hluar zel thu leh a dona kawng ah thawhho a tul thu te, Kohhran thalaite pawhin ruihhlo hluar zel dona kawngah ngaihtuahna sen tlan a tul thu leh ruihhlo laka la fihlim te venhimna lamah tan lak a tul thu bakah Kohhran Thalai ten Committee peng hrang an siam ah hemi lam hawi inzirtirna lam kalpui thei tur siam ve a tul thu te sawilan a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result