Mizoram-a raltlan te ram dan leh khawtlang inrelbawlna zawm tur turin YMA in an hriattir

Central YMA chuan sahimna zawnga rawn lut Zofa unaute chu Mizorama an awm chhûngin ram dan leh khawtlang inrelbawlna zawm tur turin an hriattir.

Tunhnai khan Central YMA hian mizoram-a raltlan rawn lut te chungchangah thuchhuah siamin Myanmar, Bangladesh leh Manipur atanga Zofa unau sahimna zawnga Mizoram-a rawn lut zawng zawngte chu Mizorama an awm chhûngin ram dan leh khawtlang inrelbawlna an zawm tur a ni tih hriattirin, “Ram leh khawtlang duh loh zawngin an awm tur a ni lo,” an ti a. Heng Raltlante hi Sawrkar leh khawtlang duh loh thil sumdawnna leh ruihhlo lakah an inhnamhnawih tur a ni lo tih pawh tarlangin, Khua leh tui tha tak anga khawsa tura beisei an nih thu an tarlang a. Sawrkar hriatpuina leh phalna lo chuan ram leh In an neih theih loh avangin, hetiang lo nei leh neih tum an awm pawhin YMA in hriatpuina a ziah sak thei lo ang tih an tarlang bawk a, In leh dawr luahman chungchangah pawh mi luah lai a man sang zawka luahlan emaw, luah sak emaw chu tih loh tur a nih thu an tarlang bawk a ni.

Hei bakah hian Central YMA chuan Myanmar leh Bangladesh atanga Raltlante chu India khua leh tui an nih loh avangin, India khua leh tuite chauhin an neih tur - Voter ID, Aadhaar Card, Birth Certificate, Tribal Certificate, Residential Certificate, Driving Licence, Vehicle Registration leh a dangte neih tumin hma an la tur a ni lo tih pawh an tarlang bawk a. Danin a phalloh thil sumdawnna leh ruihhlo do kawngah theihtawpin Sawrkar leh khawtlang an thawhpui tur a nih thu an tarlang a ni. Raltlante hi raltlan an nih ang ngeiin duh duhna hmuna insawn kual tur a ni loh tih pawh an thuchhuah ah hian tarlangin, “An awmna hmuna awm reng tura beisei an ni,” an ti a, Branch/Group leh Sub-Headquarters YMA te chu mahni huamchhung theuhvah raltlante dinhmun zirchiang a, vilvang reng tura beisei an nih thu pawh tarlangin, “Kan unaute an nih avangin tanpui an ngaih chuan theihtawp chhuaha tanpui turin kan inngen a ni,” an ti bawk.