Lok Sabha Inthlanpui neih tura Campaign in a vawrtawp a thleng chho tan mek

Tunkar Zirtawpni-a Mizoram Lok Sabha Inthlanpui neh tur atan Candidate hrang hrang ten ngawr takn Campaign an nei mek zel a, Campaign theih hun pawh a tawp dawn hnai tawh bawk a ni.

Mizoram Lok Sabha Inthlanpui neih tur atana Campaign theih hun hi tunkar Nilaini tlai ah tawp tur niin Candidate hrang hrang ten ngawrh takin campaign an nei mek a,BJP Candidate Vanlalhmuaka chuan Inrinni khan Champhai-ah thuthar thehdarhtute kawmin Lok Sabha-ah BJP kaihhruai NDA in hnehna an chang leh ngei dawn a, Mizoram in BJP MP a neih chuan hmasawnna kawngah te, tun tuma an Manifesto tih hlawhtlin kawngah te Central atanga a diltu ni lovin a petu zawk kan ni dawn a. Party rilru dahthain hmarchhak State dangte hmasawnna umpha ve turin Mizoram in BJP MP a thlantlin a ngai a ni, a ti.

MNF Candidate K. Vanlalvena chuan Inrinni khan Aizawl khawpui chhung hmun hrang hranga Street Campaign-ah thu sawiin, “Puitu ka neih miah lohna hmun, Parliament chhungah te kan tal chang a awm a. Ka hnungah Mizo mipui zawng zawng in awm tih ka hria a, min thlawp tha thin em em a, chu chuan min ti thlamuang a, huaisenna min pe thin,” tiin kan Ram, kan hnam leh kan Sakhua a him theihna tura theihtawp chhuah chhunzawm zel thei turin Mizo mipuiten hnathawhkawr hak zawm tir turin a ngen bawk a ni.

Congress Party chuan Inrinni khan Aizawl Ramhlun North Sumo stand bulah ‘Sakhaw humhimna Street Campaign’ neiin he huna thu sawitu LC. Tluanga chuan Mizoram BJP President chuan dawtin Congress a puh niin an sawi a, “Congress sawrkar laiin Kristiante nekchepin an awm nasa tia a sawi pawh hi thu belhchian dawl lo a ni a, Sakhaw nekchepna dan hi BJP sawrkar ah zel pass a ni zawk a, nikum chhung ringawt pawhin BJP Sawrkar hnuaiah Kristiante tih duhdahna hi vawi 680 chuang a thleng,” a ti bawk.

ZPM Thalai te chuan tun thla ni 10 atanga Aizawl Municipal Corporation huamchhunga Street Campaign an neih chu Inrinni khan zofelin he hunah ZPM hruaitu K. Sapdanga chuan kumin MP inthlan turah ZPM Party chuan thudik tawk lo hmanga beihna an tawk leh ta mawlh mawlh tih sawiin, “Party naupangte hian beih kan tawk nasa em em mai a, amaherawh chu Pathian leh Mipuite kan lamah in tang tih kan hriat hian kan thla a muangin min ti chak thin a ni,” tiin “Thu dik lo leh dawt hmanga eptute bei turin kan in zirtir ve ngai lo a ni. Ram tana kan tih duh leh hmachhawp te kan sawi uar hle a, chutiang ti tur pawh chuan kan theihtawpin kan thawk mek a ni. Kan MP Candidate Pu Richard Vanlalhmangaiha pawh hi Pathian zarah mipuite duhsakna changing MP atan a tlin ngei kan beisei tlat a ni,” a ti bawk.