Mizoram Lok Sabha Inthlanpui ah mipuiten tluang takin Vote an thlak ta

Mizoram Lok Sabha Intlanpui 2024 chu nimin khan tluang taka neih niin thil duhawmlo liantham thleng a awm hriat a ni lo a. Kumin-a Inthlanpui ah hian Vote tla tha lutuk lovin nimin tlai dar 5:00-a Vote thlak hun khar a nih thlengin za zela 56.68 vel tlain hei ai hian Vote tla zat hi tha hret tura ngaih a ni.

India ram Rorelna sang, Parliament House-a Mizoram in Lok Sabha Seat pakhat a neih luahtu tur thlanga Inthlanpui nimin-a neih ah hian nimin zing dar 7:00 atang khan Polling Station hrang hrangah Vote thlak a ni a, Polling Station 1,276-a inthlan buaipuitu Polling Official mi 5,071 zinga mi pakhat, venhim lam thawktu lungphu chawla a boral tih loh chu harsatna lian tham tawk an awm hriat a ni lo a, tluang takin Vote thlak hi kalpui a ni. Tun tum Lok Sabha Inthlanpui ah hian zing dar 9:00 thleng Vote za zela 17.59 tla hmanin chawhma dar 11:00 thlengin za zela 30.63 leh chawhnu dar 1:00 thlengin za zela 43.35 a tla a, chawhnu dar 3:00 thlengin Vote za zela 51.22 leh tlai dar 5:00 thleng khan za zela 56.68 vel a tla hman a, hei ai hian Vote tla zat hi la pung leh hret tura beisei a ni.

Mizoram Lok Sabha Inthlanpui-a hman Vote thlakna khawl te hi nimin tlai-a Vote thlak zawh a nih veleh anmahni District khawpui theuh ah phurhkhawm nghal a ni a, tihfel ngai ang ang te tihfel a nih hnuah Strong Room-ah dahluh nghal zel a ni a, Vawiin lam hi chuan Strong Room hi a thlen kim hman beisei a ni a, June 4, 2024-a Vote tla te chhiar a nih hma chuan venhimna khauh tak hnuaiah dah a ni dawn a ni.

Tun tum Inthlanpui-a rorellai ZPM Candidate Richard Vanlalhmangaiha chuan ZPM boruak a that thu leh tlin ngei a inrin thu sawiin, “Kum 2023 MLA inthlanah khan mipuiin hneh takin ZPM an thlang tling a, tunah hian mipuiin ZPM sawrkar an rinna a la lian tual tual mai a, chuvang chuan tlin ngei ka inring,” a ti a. MP atan thlantlin a nih chuan tuna Mizoram sawrkarin sawrkar laipuia Project hrang hrang a thehluhte bawhzui chu a hna hmasa tur a nih dawn thu a sawi bawk.

MNF Candidate K. Vanlalvena chuan, “Pathian leh mipui zarah kan khingpuite kan hneh ngei kan beisei. Kan han vahvelna atangin kan lawm ve khawp mai,” tiin tlin a inbeisei thu a sawi a, ZPM chu an khingpui ber nia a hriat thu sawiin, “Sawrkar lai party nge nge chu Ruling chakna nen kan khin ber an ni,” a ti bawk.

INC Candidate Lalbiakzama pawhin Party chhung mai ni lo mipui thlawpna tha tak an hmu tih a sawi a, Sakhaw zalenna an tlangau pui chuan mipui thlawp a hlawh hle tih sawiin tlin ngei a inbeisei tih a sawi a, mimalin tumah a bei lo tih sawiin, hnam tenau te dinhmun sang zawka dah thei turin a lo ding chhuak tih a sawi a, Hnam anga tanrual a ngai tih a sawi bawk.

BJP Candidate Vanlalhmuaka pawhin Mizo mipuiten tunhma zawng aiin BJP party kalphung an hrechiang tawh nia sawiin, Inthlan hmasa te aiin Vote pawh an hmuh that a beisei thu a sawi a. Tling zo lo mah se tunhma zawng aiin an party chu mipui tam zawkin an vote a beisei thu a sawi bawk.

PC Party Candidate Rita Malsawmi pawhin kumin Lok Sabha inthlanah Manifesto lam sawi aiin BJP thawhpui leh thawhpui loh chu party tinin an tuipui ber nia sawiin, Hmeichhe Candidate awmchhun a nih avangin a hmeichhiatpui ten an vote ngei a beisei thu leh thalai tam tak vote a hmuh ngei a beisei thu a sawi bawk.

Independent Candidate awmchhun Lalhriatrenga Chhangte chuan kumin inthlan chu MP inthlan awm tawh zinga boruak lian ber a nih thu sawiin, hmasawnna ruhrel lian Mizoram-a a awm theih nan Sakhua ngaihtuah chian a ngaih thu leh Sakhaw himna chu dah pawimawh hmasak zel a pawimawh thu a sawi bawk.