Hriata Chhangte in MP atan thlantlin a nih chuan mipuite nen inkawmna hun siam thin a tum
Tun thla ni 19-a Mizoram Lok Sabha Inthlanpui neih tura Independent Candidate Lalhriatrenga Chhangte hian nimin khan Serchhip Press Club-ah thuthar thehdarhtute kawmin kum hnih leh a chanve vel Congress Party-ah awmin an hruaitute nen an inkawmna ah MP Inthlanpui a ding tura beisei a nih avangin nikum lama Mizoram Assembly Inthlanpui-ah pawh a chuh loh thu leh Star Campaigner-ah tangin Bial hrang hrang a tlawh thu thuthar thehdarhtute zawhna chhangin a sawi a. Amaherawh chu kumin ah MPCC Inthlanpui-ah Official Nominate siam chungchang chu an party Dan kalh nia a hriat avangin AICC hotute hnenah a thlen thu leh hetiang a nih tak avang hian MP Candidate pawh a remchang dawn ta lo nia a hriat avangin kumin March 15 khan Congress Party a chhuahsan thu a sawi a ni.
Lalhriatrenga Chhangte chuan Mizoram tana MP tha tak nih theih a inbeisei thu sawiin, Political Party atanga thlantlin MP a nih chuan Party inkaihhruaina zawm a ngaih thin avangin Independent-a thlantlin MP nih chu Mizoram mipuite tana a tangkai zawk theihna tur nia a hriat thu a sawi a. MP atana thlantlin a nih chuan a ngaih pawimawh tur hrang hrang chi 10 tarlangin, thla tin Zirtawpni vawi hnihna leh vawi 4-na te chu mipuite nen an inbiaka inkawmna hunan neih theih nan hman a tum thu a sawi bawk a ni.
Independent Candidate Lalhriatrenga Chhangte chuan MP chu Parliamentarian, India ram rorelna sang bera India ram hmasawnna tur hrang hrang ngaihtuah chhuaktu anih bakah an bial (Parliamentary Constituency) tan bik pawh a remchan dan ang anga hlawk leh tangkai thei ang bera hmasawnna kawng hrang hrang (Centrally Funded projects) lo pawhluh leh sawichhuah ve chu a tum pui ber tur a ni tih a sawi a. “Pathian in tun dinhmunah chuan Mizo-Kristian-Tribal nihna min pekah hian ka chiang em em a, chumi dinhmun ropui dangdai tak chu khawi kipah pawh nun chhuahpui ka tum zel thin. Kan Pathian in he khawvela min hunchhuahna chhan bulpui ber chu Midangte tana Malsawmna ni tur tih hi ka rindan nghet tak a ni,” tiin a tumna, tuina leh inpekna te hriatthiam pui MP nih a tumna chu tih hlawhtlin a nih theihna tura an Vote pe turin mipuite chu a sawm a, “I MP (Lok Sabha) ka lo nih ve theih chuan ka theihna zawng zawng sawr chhuakin kum 5 chhung i tan, kan ram leh hnam tan, Kristian-te Pathian ropui zual nan ka theihtawp ka chhuah ang tih ka intiam nghal bawk e,” tiin a chhinchhiahna chu ‘Football pet lai’ a nih thu a sawi bawk.
Comments
Post a Comment