Inter-District Cricket-ah Serchhip District an Champion

Mizoram District hrang hrangte Cricket-a inelna khelh zawh takah Serchhip District chu a tum khatna atan an Champion.

Cricket Association of Mizoram (CAM) buatsaih ‘Inter-District Cricket Tournament’ vawi thumna hi kar kalta chhung khan Champhai-ah khelh a ni a, Mizoram District 11 zinga District 8 ten Team tirin Zirtawpni khan Serchhip District leh intihsiakna thlengtu Champhai District te chuan Final an khel a, Ser-chhip District te hian Wicket 8-a hnehna changin a tum khatna atan he inelna ah hian an Champion ta a ni.

He inelna ah hian District 8 te hi Group pahnih ah thenin Group pahnih a point hmu sang ber ve ve ten Final an khel a, Serchhip District hian Group Match vawi thum an khelh ah hnehna chang vekin Group lehlam a Point hmu sang ber Champhai nen Final-ah inhmachhawnin Cham-phai lam hian vuak hmasak an thlang a, Overs 20-ah Run 106 chiah siamin Wicket 8 an hloh a, Serchhip District lamin vaw ve lehin Overs 18.1 ah Wicket 2 chiah hlohin an target an umphak a, Wicket 8 in hnehna an chang a, Half Century siamtu Vanlalhruaia, Serchhip DCA chu 'Man of the match' atana thlan a ni bawk.

Tun tumah hian Serchhip District player Suraj Singh chuan run 132 siama Wicket 9 lain Player of the Tournament atan thlan a ni a, Ser-chhip District player bawk Hmingthanpuia chuan Wicket 9 lain Best Bowler atan thlan a ni a, ani hi Serchhip District Cricket Association hnuaia Academy atanga inzirchhuak niin Mizoram State aiawhin Age Group-ah pawh a lo khel tawh nghe nghe a. Saitual District player Sahil Reza chuan run 169 siamin Best Batsman thlan an ni bawk.

3rd Inter-District Cricket Tournament-a Champion Serchhip District Team te hian Zirtawpni zan khan Serchhip rawn thlengin an hruaitu ten an lo hmuak a ni.