Ration card Var buhfai man tur la bithliah fel lo

Mizoram sawrkarin Ration Card Var neite tan buhfai-a subsidy a pek zat tur ennawn a ni dawn a, a zat tur erawh bithliah fel a la ni lo. Hetihlai hian National Food Security Act (Card Eng leh Card Pawl)-a Mizoram in quota a neih 7,06,296 chu hnawhkhah tawh a ni.

Food, Civil Supply & Consumer Affairs (FCSCA) hotute sawi danin Ration Card Var neite hnena buhfai-a subsidy pek thin chu ennawn a ni dawn a, a zat tur erawh tihfel a la ni lova. Card Var neite hnena subsidy-a pekna zat hi kg-ah Rs. 15 a  ni mek a ni. Hemi chungchangah hian FCS&CA Minister B. Lalchhanzova chuan subsidy atana sum sen chu thla khatah cheng vbc. 3 vel tala tihhniam tum a ni tih a lo puang tawh bawk a ni.

Hetihlai hian Mizoram in NFSA hnuaia quota a neih zat chu 7,06,296 a tling a, hei hi 20,000 bawr velin hnawhkhah loh a ni thin a. Tunhnaia NFSA huanga insawn luhna hun hawn chhungin quota hi hnawhkhah a ni tawh a. FCS&CA hotute chuan tunhnaia insawnna hun hawn a nih chhungin Card Var atanga NFSA huanga insawnlut engemaw zat an awm laiin NFSA atanga Card Var-a insawn pawh an awm niin an sawi a ni. 

FCS&CA chhinchhiah danin tun dinhmunah Mizoram-ah Ration Card nei chhungkaw 2,86,362 an awm a, Ration Card-a chuang mi 11,67,024 an ni a. Ration Card zingah hian Card Eng 25,811, Card Pawl 1,48,711 leh Card Var 1,11,840 a awm a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man