CWC-in case 2,031 leh JJB in case 276 an chingfel

Nikum (2023) April atanga kumin (2024) March inkar chhung khan Mizoram-ah Child Welfare Committee (CWC) chuan case 2,031 leh Juvenile Juvenile Justice Board (JJB)-in case 276 an chingfel.

Mizoram State Child Protection Society thawktute sawi danin sawrkar kum liamta chhung khan naupang chungchang ngaihtuah tura ruat Child Welfare Committee (CWC) hian kum hmasaa case ngaihtuah hman loh (pending) 68 neiin case dawn thar 2,048 an nei bawk a. Heng zinga case 2,031 chu ching felin case 85 chu kumthar lam ngaihtuah chhunzawm turin an dah a ni a. CWC-in case an dawn thar zingah hian retheihna avanga naupang enkawl thei lo chu tam berin case 774 a tling a, hei hi case an dawn zawng zawng atanga chhutin 38% a tling a. Nu leh pa fel lo/enkawl mumal thei lo (incapacitated parents) chuan case 428 lai a tling a, hei hi case an dawn zawng zawng atanga chhutin 21% a tling a ni.

CWC case dawn thar zinga 1,098 chu hmeichhia niin mipa 950 an awm bawk a. Case an dawn zinga 1,220 chu ching felin mi 202 chu an chhungte hnenah an hlan leh a. Case kaihhnawih ah mi 264 chu Home-ah dah an niin 154 chu councelling kaltir niin 141 chu tihtawp a ni bawk.

Nikum chhung vek khan tleirawl/rawl-thar te harsatna ngaihtuah tura din, Juvenile Juvenile Justice Board (JJB) chuan case 276 an chingfel bawk a. JJB hian kum hmasa lama case pending 61 neiin dawn thar 261 an nei bawk a, case 46 chu kumthar lama ngaihtuah chhunzawm tura dah a ni. JJB case ngaihtuah zingah hian rukruk case tam berin case an ngaihtuah 276 zinga 136 lai rukruk case a ni a, hei hi case an ngaihtuah zinga 49% lai a tling a ni. JJB case ngaihtuah zingah hian POCSO Act, ND&PS Act, tualthah leh pawngsual case-te chu a langsar zualte an ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result