Tang awm thei zat aia tam Jail thenkhat ah tang mek

Mizoram-ah mi tang (prisoner) 1,386 awm theihna Jail 10 a awm a, hetihlai hian Jail thenkhat ah chuan mi tang awm thei zat (capacity) aia tam tang an awm reng a. Tun dinhmunah damchhung tang tura thiamloh chantir (convict) tawh mi 57 an awm bawk.

Prison Department tarlan danin, April ni 17, 2024 thleng khan Mizoram-a Jail hrang hrang 10-ah tang 1,386 an awm theih laiin Jail tang mek mi 1,992 an awm a, tang awm thei zat aia mi tang tamna zat chu 606 a tling a ni. 

Mizoram-a Jail lian ber, Central Jail, Ai-zawl-ah mi tang 922 awmin, tang awm thei zat erawh 438 a ni a. Central Jail, Aizawl-ah hian damchhung tang tura thiamloh chantir tawh mi 54 (mipa vek) awmin damchhung tang tura chungthu rel tawh hi Kolasib District Jail-ah mi 2 leh District Jail, Lawngtlai-ah mi pakhat an awm bawk a. Mi tang 96 awm theihna, Central Women Jail-ah mi 226 (naupang 19 telin) an awm mek bawk.

Mi tang 90 awm theihna District Jail, Aizawl-ah tang 131 an awm mek a, mi tang 109 awm theihna District Jail, Lunglei-ah tang 144 awm mekin, tang 92 awm theihna District Jail, Siaha-ah tang 68 an awm a. Mi tang 105 awm theihna District Jail, Champhai-ah mi 183 awm mek bawkin, mi 134 awm theihna District Jail, Kolasib-ah tang 134 an awm bawk. Jail tang mi 98 awm theihna Ddistrict Jail, Lawngtlai-ah tang 39 awm mek bawkin, mi tang 128 awm theihna District Jail, Serchhip-ah tang 54 an awm a, mi 96 tan theihna District Jail, Mamit-ah mitang 90 an awm mek bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man