MP Inthlanpui neih turah Polling Station 1276 awmin uluk lehzuala venhimna kalpui ngai 14 a awm
Mizoram in Lok Sabha Seat khat a neih hnawhkhahna tura Inthlanpui neih turah hian Mizoram hmun hrang hrangah mipui ten Vote an thlakna atan Polling Station 1276 awm tura ruahman a ni a, heng zinga Polling Station 751 chu Thingtlang (Rural)-a awm niin a dang Polling Station 525 te chu khawpui (Urban)-a awm a ni thung. Hmun pakhat-a Polling Station pakhat awmna hmun 1069 awmin, Polling Station pahnih awmna hmun 87, Polling Station pathum awmna hmun 7 leh Polling Station pali awmna hmun 3 a awm a ni.
Mizoram-a Polling Station hrang hrang zingah hian Venhimna uluk lehzuala kalpui ngai (Vulnerable Polling Station) 14 awmin Kolasib District-ah tam berin 7 a awm a, Bairabi-II, Saihapui-V, Phainuam, Saiphai-I, Saiphai-II, Saipum-I leh Saipum-II Polling Station te an ni a, Aizawl District-ah 3 - Mauchar, Zokhawthiang leh Tinghmun Polling Station te niin Champhai District-ah Polling Station 4- Zokhawthar-I leh Zokhawthar-II bakah Farkawn-I leh Farkawn-II Polling Station ta a ni. Heng bakah hian Critical Polling Station pawh 5 a awm bawk a, heng te hi Vote tla za zela 90 ( 90%) aia tam a nih a Candidate pakhatin vote tla atanga za zela 75 aia tam a hmuhna niin an vai hian Saitual District-a mi te vek an ni a, NE. Tlangnuam, Khawlian-I, Khawlian-II, Mimbung-I, Mimbung-II Polling Station te an ni.
Mizoram-a Polling Station hrang hrang zingah hian lirthei luh lohna, ke-a Polling Station pan ngai 11 awm bawkin heng zinga 6 chu Mamit District a mi a ni a, Bajirungpa, Kananthar, Sotapa, Zopui, Chilui leh Khanthuam niin Lunglei District-ah Polling Station 4 - Hmunthar, Dampui, Phairuangchhuah leh Belpei Polling Station bakah, Lawngtlai District-a Hlimzawl Polling Station te chu ke-a Polling Station pan ngai an ni a. Heng bakah hian Lawngleng hmanga Polling Station pan ngai 15 awmin an zinga 13 te chu Lunglei District a mi te an ni a, Lawngleng hmanga pan ngai te hi Mauzam, Terabonia, Sumasumi, Tuikawi, Tuisenchhuah, New Sachan, Salmur, Chengkawllui (Samuksuri), Nunsuri, Ukdasuri, Sugarbasara, Tlabung Dinthar leh Nunsuri-II te niin a dang pahnih hi Mamit District-a Thangkhang leh Dilzawl Polling Station te an ni thung.
Tun tuma Lok Sabha Inthlan-ah hian Model Polling Station 25 awm tura ruahman niin Lunglei District-ah 6, Serchhip, Lawngtlai leh Champhai District-ah pathum theuh; Aizawl, Kolasib leh Siaha District-ah pahnih theuh leh Mamit, Saitual, Khawzawl leh Hnahthial District-ah pakhat theuh te an ni a. Hmeichhe hlang in an enkawl tur Polling Station, All Women Managed Polling Station 136 siam niin Aizawl District-ah 48, Lunglei District-ah 24, Lawngtlai District-ah 20, Mamit, Kolasib leh Champhai District-ah 9 theuh, Saitual, Khawzawl leh Siaha District-ah pali theuh, Serchhip District-ah pathum leh Hnahthial District-ah pahnih te an ni.
Auxilliary Polling Station pawh Lunglei District-ah 4 siam niin All Youth Managed Polling Station chu Lawngtlai District-ah 3 bakah Kolasib, Khawzawl, Serchhip leh Hnahthial-ah Polling Station pakhat theuh, a vaiin 7 siam a ni a. Aizawl North-III, Zarkawt-II ah PwD Managed Polling Station siam a ni bawk.
Tun tuma Lok Sabha Inthlanpui neih turah hian tunkar Zirtawpni khian mipui ten Vote an thlak dawn avangin hmun hla zuala Duty tur Polling Party te chu tunkar Nilaini atang khian chhuak tura beisei an ni a, a nawlpui chu Ningani-ah an chhuak dawn a ni.
Comments
Post a Comment