Myanmar atanga raltlan Mizoram-ah la tam; Ramri khar tum kalpui a ni dawn rih lo

Mizoram chhungah Myanmar atanga sahimna zawnga raltlan rawn lut 34,282 an awm mek a, hetihlai hian naktuk atanga India leh Myanmar inkalpawhna khar tum chu khar a ni leh dawn lo tih Assam Rifles bhotute chuan an sawi.

Myanmar tualchhung buaina avanga sahimna zawnga Myanmar atanga Mizoram-a raltlan awm mek mi 34,282 zinga mi 15,938 te hi Relief Camp hrang hrang 147-ah awmin mi 18,344 te erawh chuan an chhungte leh thiante an belh bakah engemaw zat chu mi In luaha khawsa leh an hnathawhna hmuna awm chilhte an ni a. Tun dinhmuna raltlan awm mek te zinga mi 10,899 chu hmeichhia an ni a, mipa 10,073 leh naupang 13,310 an awm bawk. Khawzawl, Kolasib, Saitual leh Serchhip District-ah te Relief Camp sak a ni lova, District dang 7-ah Relief Camp awmin Siaha District-a Relief Camp hrang hrangah mi 3,888 an awm a, Lawngtlai District-a Relief Camp 36-ah mi 3,519 an awm a. Champhai District-a Relief Camp 23 awmah mi 6,346 zet an awm thung.

Champhai District-ah hian Myanmar raltlan an awm tam ber a, an vaiin mi 14,499 an awm a, Siaha District-in dawtin mi 6,044 an awm a, mi 5,864 awmna Lawngtlai District-in a dawt leh a ni. Zokhawthar Relief Camp-ah raltlan an awm tam ber a, mi 3,290 zet awmin, Farkawn khua-a Relief Camp-ah mi 1,426 an awm bawk.

Hetihlai hian tunhnaiah India leh Myanmar ramri-a venhimna hna thawktu Assam Rifles ten thla thar, May 1, 2024 atangin ram pahnihte inkalpawhna chu khar a ni dawn tih sawi mah se khar a ni leh dawn lo nia thudawn a ni a, Assam Rifles hotute chuan, Mizoram leh Myanmar inrìnaa inkalpawhna kawngte chu May 1, 2024 atangin khar a ni dawn rih lo tih sawiin, chutih rualin Myanmar lam atangin ruihhlo a lo luh nasat avangin ramri kan-a kalte chu a tul angin uluk takin endik an ni thin dawn tih an sawi a ni.

Assam Rifles hotute hian Ministry of Home Affairs atanga thu an dawn angin May ni 1, 2024 atang chuan Champhai District chhunga Border Haat chu khar a ni dawn tih lo sawi tawhin, April thla chung chu ngaihnathiamna kalpui a ni anga, ram pahnih mite darkar 72  (ni 3) chhung an la cham thei dawn a. Engemaw harsatna avanga hun bi tuk chhung aia rei cham turte chuan duty-te phalna lak hmaksak tur a nih thu leh, phalna la lote chungah erawh chuan action lak a ni thung dawn tih an lo sawi tawh bawk a ni.