Mizoram-ah Congress in Lok Sabha MP an nei ngun ber

Mizoram-ah Lok Sabha Inthlanpui vawi 13 neih tawh ah Congress party-in Lok Sabha MP an nei ngun ber a; State sawrkara Ruling Party vawi 11 an tling tawh a ni.

India ramah Lok Sabha Inthlanpui tum 18-na nimin-a neih a nih laiin Mizo-ram-ah chuan a tum 14-na atan Inthlanna hi neih a ni thung a, Inthlanpui vawi 13 neih tawh ah State a Ruling Party chu tum 11 thlantlin niin tum thum erawh State sawrkar-a Ruling Party Candidate ni lo te thlantlin an ni thung a. INC-in tum ruk Lok Sabha-ah MP an nei tawh a, MNF-in tum hnih nei tawhin tum thum chu Independent Candidate thlantlin an lo ni tawh bawk a ni.

Mizoram hian kum 1972-a Union Territory dinhmun a nih atangin MP Lok Sabha MP a nei ve chauh a, Mizoram Lok Sabha MP hmasa ber chu Sangliana (Mizo Union) a ni a, kum 1977-ah PC atangin R. Rothuama chu thlantlin niin kum 1980-ah Independent atangin thlantlin leh a ni a. Kum 1984-ah khan INC atangin Lalduhoma chu chuhtu awm lovin tling-ah puan a lo ni tawh bawk. 

Mizoram in State dinhmun a chan hnu a Lok Sabha Inthlan hmasa ber kum 1989-a neih ah INC atangin Dr. C. Silver chu thlantlin ni ve lehin kum 1991 leh 1996-ah te thlantlin nawn a ni a, kum 1998 a Lok Sabha Inthlanpui-ah Independent Candidate Dr. H. Lallungmuana chu thlantlin ni ve lehin sawrkar laipui-ah sawrkar dinglai a tlak avanga kum 1999-a Inthlanpui neih leh ah Independent Candidate bawk Vanlalzawma chu thlantlin a, ani hi kum 2004 khan MNF atangin thlantlin leh a ni bawk.

Kum 2009-a Lok Sabha Inthlanpui neih ah INC atangin CL. Ruala chu thlantlin a ni ve leh a, ani hi kum 2014 khan thlantlin nawn leh niin kum 2019-a Inthlanpui neih leh ah MNF atangin C. Lalrosanga chu thlantlin a ni ve leh bawk a, tun thlengin he hna hi la chelhin MP thar thlanna atan hian nimin khan Mizoram pumah Vote thlak a ni leh ta chiah a ni.