Mizoram-a Lok Sabha Inthlanpui Vote thlak zo in Vote tla zat zaa 56.87 nia chhinchhiah a ni

Mizoram Lok Sabha Inthlanpui-a Vote thlak chu tluang taka zawhfel a ni ta a, Mizoram pumah Vote za zela 56.87 tlain hetah hian Postal Ballot leh ETPBS te chhiar tel a ni lo a, Vote nei zat atanga chhutin Mizoram District hrang hrang zingah Aizawl District-ah Vote tlak chhiatna ber District a ni.

Chief Electoral Officer (CEO) Mizoram Office atanga thudawn danin 1-Mizoram (ST) Parliamentary Constituency-a Inthlanpui atana Vote thlak hi Zirtawpni kalta khan Mizoram-ah tluang taka neih a ni a, Mizoram chhung Polling Station hrang hrang 1276-a vote tla zat chu Form 17A leh document pawimawh dangte nen enfiah a nih hnuah Mipa 2,41,213 leh Hmeichhia 2,45,800; an vaiin mi 4,87,103 ten Vote an thlak nia chhinchhiah a ni a, vote tla hi za zela chhutin 56.87% a ni. Heng Vote tla ah hian Postal Ballot leh Electronically Transmitted Postal Ballot System (ETPBS) kaltlanga vote tla chhiar tel a la ni lo thung a, Postal Ballot kaltlanga vote tla zat hi April 19, 2024 thleng khan 2107 a ni a. Hengte hi Home Voting atanga vote tla 1983 (kum 85 chunglam vote 1715 leh PwD vote 268) leh Essential Services vote 124 an ni a. Electronically Transmitted Postal Ballot System (ETPBS) kaltlanga thawnchhuah Service Voters 4693 te vote thlak zat hi hriat theih a la ni lo thung a, Service Voters te hian Vote an thlak hnuah rawn thawnkir in Vote chhiar hma chu rawn thleng thei tura ngaih a ni.


Mizoram District hrang hrang 11 te zingah Voters awm zat atanga chhutin Mamit District-ah Vote tla tha berin 63.45% a tla a, Lawngtlai District in dawtin 63.37% a tla bawk a, heng District pahnih chiah hi Vote tla za zela 60 tlinna a ni a, Aizawl District chu Vote tlakchhiatna ber niin 53.29% a tla a, Saitual District in dawtin 53.35% a tla bawk a ni.

Kum 1977 atang khan Lok Sabha MP Inthlanpui hi vawi 12 neih a ni tawh a, vote a tlak that ber tum chu kum 1996 kha niin vote tla zat hi 73.41% a ni a, a chhiat ber tum chu kum 1977 niin vote tla zat hi 49.92% a ni thung. Hei bakah hian kumin 2024-a vote tla zat aia a tlem hi tum hnih dang la awmin kum 1980 khan 56.12% leh kum 2009 khan 51.86% te a lo tla tawh bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man