Police Observer in Inthlan inbuatsaihna a enpui

Lok Sabha Inthlanpui neih tura 1-Mizoram (ST) Parliamentary Constituency viltu Police Observer K. Satyanarayana IPS chuan nimin khan Serchhip rawn tlawhin Inthlanpui neih tur atana mawhphurhna hrang hrang chelhtute a kawm.
Serchhip DC Meeting Hall-a he inkawmna ah hian Serchhip District Bawrhsap leh District Election Officer David Lalthantluanga chuan tun thla ni 16-a Mizoram Lok Sabha Inthlanpui neih tur atana Serchhip District inbuatsaih dan a sawi a. Serchhip District pum chu Sector 13-ah then a nih thu te, Sector Officer leh Sector Police in an vil reng thu te leh Polling Station 88 te tlawh-chhuakin a tul anga thuamchak an nih vek tawh thu a sawi a. Serchhip SP MS. Dawngkima pawhin dan leh thupek kenkawh kawngah leh venhimna kawnga an hmalakna te sawiin inthlan hmachhawn turin inbuatsaihna peihfel a nih tawh thu a sawi a ni.


Police Observer K. Satyanarayana chuan Mizoram chu ram ralmuang, mipui mimir in dan an ngaih pawimawhna hmun a ni tih sawiin, inthlanpui lo awm tur pawh harsatna awm loa tluang taka zawhfel a nih theih a beisei thu a sawi a. Mizoram chu International Border a awm a nih vangin ruihhlo leh ralthuam tawlhruk awm thei lakah inven fimkhur a tul thu sawiin, hemi kawngah theihtawp chhuaha dan leh thupek kengkawhtu Police ten tan an lak tul a tih thu a sawi bawk a ni.

Hei bakah hian Inthlanpui felfai leh thianghlim taka neih a nih theih nan Sector Officer leh Sector Police te chu an bial theuh uluk taka vil turin Police Observer chuan a hrilh a. Vote thlak ni, Poll Day-ah harsatna thleng palh theih a nih hria a, an Sector Duty-na theuh te vil uluk turin a chah a. Inthlan a zawh tawh hnuah Strong Room venhim kawngah Police ten englai mahin an tha an thlah tur a ni lo a, vote chhiar zawh a nih hma chu nitin darkar 24 chhung uluk takin an veng thin tur a nih thu a sawi bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result