Rial tla avanga In chhia ala awm belh zel

Inrinni zing khawvar hma khan Khawzawl District chhunga khaw pahnih-ah Rial tla avangin In engemaw zat a chhia.

Inrinni zing dar 2:00 vel khan Khawzawl District chhungah Rial nasa taka tlain Tualpui khuaah In 24 vel leh Vankal-ah In 27 vel a chhe bawk a, heng chhiatna thlenna hmun ah hian Khawzawl aTangin sawrkar thu-neitute tirh nghal niin chhiat tawk te chhawmdawl lailawk (immediate relief) atan Silpauline sem chhuah nghal a ni a, Tualpui leh Vankal khuaa chenna In chung chhia te hi Village Level Disaster Management Committee kaihhruainaa thawm-That nghal a ni bawk.

Heti hian April ni 20 aTanga nimin thlenga rial tla, ruah sur leh thlipui tlehin Mizoram hmar lama In a tihchhiat tawh zat hi 650 chuang a tling tawh a, report hi dawn mek zel a ni. Nilaini tlai lam khan Vanbawng, Sunhluchhip leh Khawlian khua a In tam tak chu rialin a deng chhia a, thu-dawn danin Vanbawng khua-ah hian In 54 a deng chhia a, Sunhluchhip khua-ah hian In 56 deng chhiain heng zinga In 15 chu luah zui tlak loh khawpin a chhia a. Khawlian-ah hian In 25 a deng chhe bawk a, In chhia zinga 7 chu luahzui tlak loh khawpa chhia a ni. Hemi hmalam kar kalta Thawh-Tanni leh Pathianni hmasa tlai lamah khan Thli leh rial thawkin Mizoram hmarlama In 456 aia tlem lo a ti chhe tawh bawk a ni.

Sawrkar chuan chhiatna thlenna District Bawrhsapte’n chhiatna thlen thulha an lo hman tur silpaulin a lo pek sa hmangin Tanpuina a theih ang angin a pechhuak nghal zel a. A Tul dan angin rangva pawh pek chhuah mek zel a nih bakah State Disaster Response Fund (SDRF) sum hmanga pawisa fai a Tanpui tura ruahmanna siam a ni a. A daih lohna chu sawrkar laipui-ah dil belh tum mek a nih thu Disaster Management and Rehabilitation Department hotute chuan an sawi a ni.