Campaign theih hun tawp thlengin beihpui thlak a ni

Mizoram Lok Sabha Inthlanpui neih tur atana Campaign theih hun chu nimin tlai dar 5:00 khan a tawp ta a, nimin tlai-a Campaign theih hun a tawp dawn thleng khan Political party leh Candidate te chuan ngawrh takin campaign an nei a ni.

Rorellai ZPM Party chuan nimin khan Aizawl Vanapa Hall-a Lok Sabha Inthlanpui neih tur atana Campaign kharna hun hmangin ZPM Leader leh Chief Minister Lalduhoma bakah an Candidate Richard Vanlalhmangaiha te chuan thu an sawi a ni. MNF Party chuan nimin khan Aizawl Vanapa Hall tual-ah Campaign kharna hun hmangin an Candidate K. Vanlalvena bakah Campaig Directorate Chairman Tawnluia leh MNF Treasurer Lalruatkima te chuan thu an sawi bawk a ni.

Indian national Congress (INC) Candidate Lalbiakzama chuan nimin-a Campaign theih hun tawp hma khan Aizawl Press Club-ah thuthar thehdarhtute kawmin a ngaih pawimawh hrang hrang a tarlang a. BJP chuan nimin khan Siaha-ah Vantlang Inkhawm neiin Union Finance Minister Nirmala Sitharaman-i chuan a rawn hmanpui a, tlawmngai pawl hrang hrang, Kohhran te leh MDC lam hmuin hemi zawh hian Lengpui Airport-ah thuthar thehdarhtute a kawm bawk a ni.

Tarlan tawh angin tun tum Inthlanpui neih tur atana Campaign theih hun tawp, nimin tlai dar 5:00 atanga vote thlak ni, Zirtawpni tlai dar 5:00 thleng, darkar 48 chhung chu ‘Silence Period’ kalpui tur a ni a. Hemi hun chhung hian TV leh Electronic Media bakah Social Media-ah te inthlan kaih-hnawih thil tarlan leh tihchhuah khap a ni a. Inthlan kaihhnawiha inkohkhawm leh thusawi khap a nih bakah inthlan kaihhnawiha mipui intihhlimna, ennawm leh hlimhlawpna engmah buatsaih phal a ni lo a. Candidate leh political party te’n Press Conference leh Interview an huaihawt phal a ni lo a. Thupek zawm lo te chu kum 2 thleng lungin tan tir emaw, lei chawi tir emaw, a pahniha hrem theih an ni bawk.