MPSC hna lak dan chhuitu tur sawrkar in a ruat

Mizo Zirlai Pawl (MZP) chuan Mizoram Public Service Commission (MPSC) Chairman ban phut nana niminpiah atanga MPSC-a thawktute Pisa kai tur an dan chu nimin tlai dar 2:00 khan an titawp ta a, MPSC hnuaia hna lak danah thil fello nia sawi chungchang hi chhui turin sawrkar chuan M. Lalmanzuaia (IAS Retd) chu a ruat bawk a ni.

MZP te hian MPSC hnalak hrang hrangah diklo tam tak a awm nia an hriat avanga MPSC Chairman chu mawhphurhna laa bang tura an phutna kal zelah an ngenna in awmzia a neih loh avangin niminpiah atang khan MPSC a thawktute Pisa kai tur chu an dang a, nimin khan Pisa kai tur hi dang lehi MPSC Office kawtah zirlaite an pungkhawm chhunzawm a. Nimin zing dar 8:00 atang khan MPSC Office kai tur an dang tan a, MPSC hnathawktute tumah Office kal luih tum an awm lo nia sawiin, boruak muanawm tak hnuaiah hun hman a nih thu leh chawhnu dar 2:00 khan MPSC Office kai tur dan hi a titawp rih a nih thu an sawi a ni.

Hetihlai hian Chief Minister Lalduhoma chuan nizan hmasa-a Khawzawl Zaingen Veng YMA Hall-a thu a sawina ah tunhnaia MPSC-in Combined Competitive Exam a kalpui dan leh Forest Officer a lak danah thil fello nia zirlai hruaitu ten a hnena an thlen chu chhuichian a ni dawn tih a sawi a. Zirlai hruaitu ten MPSC hna lak danah thil fello awm tia a hnena an thlen chu thil diklo a awm leh awm loh a sawi theih loh thu sawiin, chhui chiang turin thupek tihchhuah a nih thu a sawi a. M. Lalmanzuaia (IAS Retd) chu chhui tura a ruat thu leh ni 7 chhunga report pe tura tih a nih thu a sawi bawk a ni.

Mizoram sawrkar chuan tunhnaia MPSC-in Combined Competitive Exam a kalpui dan leh Forest Officer a lak dan chungchang chhuina tur hi niminpiah khan thupek tichhuakin a tarlang a, hemi chungchang chhui tur hian Mizoram sawrkar-a Chief Secretary hlui leh MPSC Chairman hlui M. Lalmanzuala, IAS (Rtd) chu ruat niin amah pui tur hian DP&AR (GSW) Deputy Secretary H. Lalrinpuia leh Vigilance Department Deputy Secretary Vanrammawii te ruat an ni bawk a, thupek chhuah atanga ni 7 chhunga Report thehlut tura tih a ni bawk.

Hetihlai hian nimin tlai khan MZP hruaitute chu thukhawm nghalin Mizoram sawrkar Vigilance Department-in MPSC hnalak dana thil fello awmte chhuitu tur Inquiry Officer (IO) atan M. Lalmanzuala a ruat chu lawmawm an tih thu leh dikna duh mi, mi huaisen a nih avangin Inquiry Officer hi a ringtawk tih an sawi a. IO-in zalen taka hna a thawh theih nan leh chak zawka hna a thawh theih nan MPSC Office kawt-a punkhawm chu chu chhunzawm rih loh relin, MPSC Office chu khar a, tumah hna thawk lo turin thuneitute an ngen nghal bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result