Mizoram District 4-ah ASF leng leh tawhin Serchhip District-ah khapna thupek siam a ni

Mizoram chhunga District pali (4)-ah African Swine Fever (ASF) leng vangin Vawk 285 a thi leh tawh a, ASF laka invenna atan Serchhip District-a Vawk leh Vawksa lakluh thu ah khapna tihchhuah a ni.

AH&Vety Department thuchhuah in a tarlan danin Mizoram-ah Vawk hri, African Swine Fever (ASF) hri leng hmuhchhuah belh zel a ni a, hriat theih chinah Aizawl, Champhai, Lunglei leh Khawzawl-ah vawkpui hri leng hi report a ni a, tun dinhmun-ah Vawk pul hri leng mek avang hian Vawk 285 an thi tawh a, Vawk 95 te chu ASF vang ni ngei a rinhlelh te chu talh an ni tawh bawk a ni.

AH & Vety Department in Vawk pul hri African Swine Fever (ASF) leng chungchanga mipui hriattur thuchhuah a siam hnua hri lenna huamchhunga Vawk damlo talh lui avangin Police-ah FIR thehluh a ni tawh bawk a, FIR-a a lan danin Aizawl Kulikawn leh Salem Veng te chu tun thla ni 17 khan ASF lenna hmun, Infected Area-ah puan a ni a, Local Council-ah pawh hriattirna pek niin an ni pawhin khapna thupek hi mipui-ah an an hriattir tawh a, chuti chung chuan Sanghluna, Salem Veng chuan April ni 20 khan Vawk damlo talhin a zuar tih report an dawng a, ani bakah hian Darchhuanthanga, Salem Veng Aizawl chuan April 25 khan Vawk a talh thu report an dawng leh a, hei hi dan pawisak lohna leh mipui tana thil pawi tak mai thlen thei anih avangin Police te hmalak sak turin an ngen a, Police te chuan a tul angin hma an la nghal a ni.

Hetianga Mizoram hmun thenkhat a African Swine fever (ASF) hri leng a awm leh avang leh khaw thenkhat chu Infected Area ah puan a nih leh tak avangin Serchhip District Magistrate David Lalthantluanga chuan Serchhip District chhunga ranvulh te a lo him zawk nan Section 144 CrPC 1973 in thuneihna a pek angin April ni 24, 2024 khan Serchhip District-a Vawk lakluh chungchang ah khapna thupek a tichhuak a. He thupek a tarlan a nih danin Serchhip District chhungah ramdang (Foreign Countries) leh State dang leh District atanga Vawk, Vawk sa leh Vawk sa atanga thilsiam reng reng lakluh khap tlat a ni a, Serchhip District chhung khua leh khuaa Vawk in lakpawh tur te reng rengin Vawk hrisel tha ngei a ni tih AH& Vety Department a thawktute hriatpuina an la ngei ngei tur a ni a. Vawk hrisel chauh talh tur niin Vawk damlo te talh tura sawngbawl lo tur leh Vawk damlo leh thi te chu AH& Vety Department a hriattir vat tur a nih bakah Vawk thi reng reng chu thuk taka phum thin tur a nih thu tarlan a ni a. He thupek hian thu leh awm hma chu Order chhuah ni atanga thla hnih (2) chhung a huam anga, Thupek zawmlo te chu Section 188 IPC hmanga hrem theih an ni ang.