MSCW Chairperson ruatna sut leh turin Mizoram sawrkar an phut thu MSU in an sawi

Mizo Students’ Union (MSU) General Hqrs. chuan Mizoram State Commission for Women Chairperson atana ruat chu danin kum bithliah a siam anga tlin tawh lo nia sawiin, he Appointment Notification hi a rang thei ang bera sut leh thuai turin sawrkar an ngen.

MSU General Hqrs. chuan nimin khan Aizawl-ah thuthar thehdarhtute kawmin Planning & Programme Implementation Department RTI chhanna April ni 15, 2024 atanga a lan danin Chairperson-a appoint tak C. Lalchhandami, Councillor, AMC Ward III chu kum 2016 March ni 31-a Supernuation-a pension tawh tih he notification-a inziak angin ruat a nih atanga kum 3 chhung emaw, kum 65 tlin hma, khawi emaw zawk zawk chhung Office hna a chelh thei ang tih chu bawhchhiat a ni tih hriat a ni tih an sawi a.

Mizoram State Commission for Women Chairperson atan ruat hi a pension kum atanga chhutin kumin hi a kum 68-na tur a nih thu sawiin, hei bakah hian kum 2021 AMC inthlan pamphlet-a a kum tarlan atang pawhin kum 66 a ni ta hrim hrim tih an sawi a. Heti chunga March ni 8, 2024-a ruat a nih chungchang hi hriatthiam har an tih thu sawiin, sawrkar-in dan dinglai kalha a ruat chu MSU chuan induhsakna vang liau liau ah an ngaih thu leh dikna tundin nan he notification hi a rang thei ang bera sut leh turin a ngen nghal bawk tih an sawi a ni.

MSU chuan Mizo-ram State Commission for Women chu kan hmeichhiate himna leh hmasawnna atana thawktu tur a nih avang leh hnam anga kan dinchhuah theihna tur kawngah hmeichhiate an pawimawhzia hre rengin beiseina sang tak nen he Commission hi a thlir reng thin tih an sawi a. Thudik din chhuahna kawngah a tul ang zelin sawr-kar a thlawp zel dawn tih pawh sawiin, MSCW ruat chungchangah pawh dan ang ngei a nih theihna turin a tawp thlenga MSU hmalakna thlawp turin Mizo mipuite leh zirlaite an sawm thu an sawi bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result