Mizoram Lok Sabha Inthlanpui atan inbuatsaih fel niin Tukin dar 7:00 atangin Vote thlak a ni dawn

Mizoram Lok Sabha Inthlanpui neih tura Vote thlak turin inbuatsaihna peihfel a ni ta a, nimin khan Polling party zawng zawng ten an Duty-na tur hmun pan kimin tukin dar 7:00 atang hian Polling Station hrang hrangah Vote thlak a ni anga, Vote thlak hun hi Vawiin tlai dar 5:00 thleng hawn a ni ang.

Lok Sabha-a Mizoram in Seat pakhat a neih luahtu tur thlanna Vawiin-a neih tur atan hian inbuatsaihna engkim peihfel a ni tawh a, Serchhip District-ah chuan District chhunga Polling Station 88-a Duty tur Polling Party leh Reserve Team turte tihfel a nih hnuah nimin zing dar 8:00 khan District Election Officer David Lalthantluanga leh Senior Micro Observer Robert Zosangliana hovin DC Office-a Strong Room chu hawn a ni a, hemi hnu hian Polling Party hrang hrangten inthlanna hmanrua an hman tur EVM leh VVPAT te pekchhuah nghal niin an Duty-na tur Polling Station theuh an pan nghal a, Polling Party kalchhuak te hi District Election Officer David Lalthantluanga, Adl. DC James Lalnithanga, Election Officer Gaston Vanlalhriatpuia leh Official dang ten an vailiam a ni.


Serchhip District-ah hian Polling Station hla zual, inthlan hma ni hniha pan ngai P-2 Polling Station a awm loh avangin nimin khan Polling Party zawng zawngte hian an duty na hmun tur an pan thei a, nimin zing lamah khaw awmdan in a zir loh avang leh ruah te a sur avangin harsatna thlen hlauhthawnawm mah se khaw awmdan a ziaawm tak avangin harsatn awm lovin Polling Party te hi an chhuak kim thei a. Serchhip DC Office atanga chhutin Polling Station hla ber chu Hrangturzo Assembly Constituency Segment chhunga mi 28/22-Sailulak niin, km 79.5-a hla a ni a. Polling party te hi an Polling Station hlat dan a zira chhuakin a chhuak hnuhnung ber, Serchhip khawpui chhunga Duty turte chuan nimin chawhnu dar 2:00 khan Serchhip DC an chhuahsan a, harsatna awm lovin an thleng kim nia thudawn a ni.

Mizoram in Lok Sabha-a Seat pakhat a neih chuh hian Candidate mi 6 an awm dawn a, heng zinga mi panga te chu Mipa niin Hmei-chhia Candidate pakhat a awm bawk a, Candidate te hi INC Candidate Lalbiakzama; ZPM Candidate Richard Vanlalhmangaiha; BJP Candidate Vanlalhmuaka; MNF Candidate K. Vanlalvena leh MPC Candidate Rita Malsawmi te bakah Independent Candidate Lalhriatrenga Chhangte te an ni.

Electoral Roll thar berin a tarlan danin tun tum Lok Sabha Inthlanpui neih turah hian Mizoram-ah vote nei mi 8,56,364 an awm a; heng zinga 4,14,805 hi mipa niin hmeichhia 4,41,559 an awm a, Service voters 4,963 (Mipa 4872 leh Hmeichhia 91) an awm bawk. Kum 85 chunglam voters 4741 (Mipa 2167 leh Hmeichhia 2574) awmin PwD voters 3397 (Mipa 1876 leh Hmei-chhia 1521) an awm a, Young Voters, kum 18 leh 19 mi 36,370 awmin heng te hi Mipa 18,659 leh Hmeichhia 17,711) an ni.

Heng Vote nei ten Vote an thlakna tur hian Polling Station 1,276 siam a ni a, Thingtlang (Rural) Polling Station 751 leh Khawpui (Urban) Polling Station 525 a ni a, chawhrualin Polling Station pakhatah voter 671 zel an awm a ni.

Tun tumah hian Mizoram pumah Vulnerable Polling Station 14 awmin Critical Polling Station 5 a awm bawk a, Lirthei luh lohna, ke a pan ngai Polling Station 11 awmin Lawng-leng hmanga pan ngai Polling Station 15 a awm bawk. Model Polling Station pawh Mizoram pumah 25 awmin Auxilliary Polling Station chu Lunglei District-ah 4 a awm a, All Women Managed Polling Station (Pink Polling Station) 136, All Youth Managed Polling Station 7 leh PwD Managed Polling Station 1 a awm bawk a, Vote thlakna khawl EVM leh VVPAT te mamawh tawk a awm bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result