MJA Serchhip District Member ten Assam leh Meghalaya-a Pangang khawina an tlawh

Mizoram Journalists’ Association (MJA) Serchhip District Member te chu India hmarchhak State thenkhat a Pangang khawi kawnga hma an lak dan zirin kar kalta khan Assam leh Meghalaya State-ah an zinchhuak a, Zirtawpni khan Mizoram rawn thlengin an thil hmuh te Chief Minister hnenah an thlen nghal.

MJA Serchhip District Member mi 11 leh anmahni hruaitu Sericulture Department-a thawk mi pahnih te hian kar kalta Thawhtanni atang khan India hmarchhak-a Pangang khawihna kawnga hmalakna hrang hrangte hi tlawhin Nauthak/Bul Pangang (Muga) leh Mutih Pangang (Eri) an khawina hmun hrang hrang te, Pangang chi siamna hmun te, Pangang tui (cocoon) atanga lazai an siamchhuah dan te, Silk puan siam chhuahna leh an zawrhchhuahna hmunte an tlawh a. Thawhtanni khan India hmarchhaka Silk puan zawrhchhuahna hmun lian ber Guwahati-a awm, Fabric Plus tlawhin Thawhlehni leh Nilani-ah Assam-a Pangang khawina hmun lian ber, Pangang khawitu 42,500 vel awmna Bodoland Territorial Council (BTC) huam chhunga hmalakna te an tlawh leh a. Hetah hian Kokrajhar-a Bodoland Silk Park-te leh mimal leh Society-in Pangang an khawina hmunhma te an tlawh bawk a. Ningani khan Central Silk Board (CSB)-in Nongpoh, Meghalaya-a Pangang chi siamna hmun an buatsaih, P3 Unit Office leh Plantation te an tlawh bakah Guwahati-a CSB hmunpui MESSO-te an tlawh a, heng hmun hrang hrang an tlawhnaah hian thawktute leh Pangang vulhtute nen inkawmin an hmalakna hrang hrangte an zawtfiah bawk a ni.


Tun dinhmunah Mizoram-ah Pangang chi siam chhuahna, P3 Unit Office chu Thenzawl-a din tuma ruahmanna siam mek a ni a, hemi a hlawhtlin theihna tur kawnga mi pawimawh tak, Mizoram-a P3 Unit Office din a nih theihna tur ngaihtuahtu Committee-a Member Convener ni mek, Dr. Kartig Neog, Director, MESSO, Central Silk Board, Khanapara, Assam leh a thawhpuite nen pawh inkawmin Central Silk Board Scientist mi pawimawh dangte nen an inkawm nghal bawk a ni.

Heng State pahniha Pangang vulhna hmun an tlawhnaa thawktute chuan Pangang vulhna kawngah Mizoram chuan ram leilung leh sik leh sa-ah theihna sâng tak a neih thu an sawi a, Mizorama Sericulture hmalaknaah Pangang vulh dan te, Pangang chi inpek chungchangahte pawh an theihna zawn apianga Mizoram puih an inhuam thu MJA member-te hi an lo hrilh a ni.


Mizoram-ah Muga Silk a hmasawnna nei turin Department leh Farmer lamah ruhrel awm nual tawh sa hmanga reilo te ah kuthnathawktute tana hmasawnna tura pen theih vat a chakawm an tih thu MJA Member te chuan sawiin, Hand Holding Policy hmanga tih hlawhtlin theih vat an beisei  tih an sawi bawk a ni.

MJA Member te hian Zirtawpni chhun khan Mizoram rawn thlengin Zirtawpni chawhnu lam khan Chief Minister Lalduhoma chu a Office-a an hmu nghal a, he hunah hian an zinna-a an thil hmuh hrang hrangte Chief Minister hi hrilhin, Mizoram economy chawikanna atana Sericulture chu nasa taka hman tangkai theih nia an hriat thu an sawi a, Chief Minister pawhin Sericulture lama Mizoramin theihna a neih thu leh pangang vulhtuten an cocoon tharchhuahte an hralhna rate pawh tihsan thuai tum a nih thute a lo hrilh a ni.

Tun tuma Sericulture Press Tour-a kal MJA Member te hi Central Silk Board-a Scientist ‘D’ Dr.Lalthlamuana Pachuau, tuna Mizoram sawrkara deputation-a thawk mek leh Lalduhsaki Ralte, Sericulture Promotion Officer (SPO), Sericulture Department, Mizoram-ten kaihruaiin an zin chhung zawng hian an kalna apiangah Central Silk Board-a Scientist ‘D, Bidyut Nath Choudhury chuan a hruai a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man