Lok Sabha Inthlanpui neih tur atan Candidate ten Campaign an nei mek

Mizoram Lok Sabha Inthlanpui neih tura Candidate hrang hrangte chuan ngawrh takin Campaign an nei mek zel.

ZPM Candidate Richard Vanlalhmangaiha chuan Mizoram chhim lam fang chhunzawm zelin nizan hmasa khan Tlabung-ah hun hmangin nimin khan Lunglei-ah hun a hmang leh a, MNF Party-te'n tu emaw hmanrua ah hmangin dawihzep takin midang phen atangin an bei nia sawiin, “Midang phen atanga min bei lo hian FIR thehlut sela, ka dik lo a nih chuan Zoram mipuite'n min vote lo mai rawh se,” tiin thlantlin a nih chuan mihring leh Pathian hmaah a eiru lo tura a intiam thu a sawi. Naupangte a nih laiin vai ho zingah a khawsak thin dan te sawiin, “Tunah hian a tak takin Mizoram aiawh turin vai rual zinga che tla leh turin MP candidate ka lo ni ta a, Mizoram aiawhtu tur nih ngei pawh ka chak hle,” a ti a, Mizoram Budget chu hmasawnna hna liantham thawh nan a beitham hle nia sawiin, Budget piah lam haichhuak turin sawrkar laipui ah ruahmanna thehthlak zung zung a tul tih a sawi bawk.

MNF Candidate K. Vanlalvena chuan nimin khan Darzo, Hnahthial, Thiltlang, Pangzawl leh Chhiahtlang te tlawhin MP (LS)-ah thlantlin anih chuan hmalakna tam tak awm tur zingah a ngaih pawimawh hmasak, tihhlawhtlin ngei a tumte sawiin, Mizo thalaite eizawnna dapsak chungchang te, buh leh bal-a intodelh tura kut hnathawktute dinhmun chawisan te, ranvulhtu te tana hmalakna tur te, Border Trade chungchang te chu a hna pui ber tur a nih thu a sawi a. “Mizoram tana ka hmalakna hrang hrangte tihhlawhtlin theihna tur chuan Central sawrkar leh ZPM sawrkar pawh tha takin ka thawhpui ang,” a ti a. Mizoram-a Kut hnathawktute thawhchhuah tlemzia chuan a rilru a tihnat thin thu pawh sawiin, hemi kawnga hmalak a tum thu te a sawi bawk.

Congress Candidate Lalbiakzama chuan nimin khan Kolasib tlawhin thuthar thehdarhtute a kawm a, MP inthlan chu tualchhung politics a inbeihna mai ni lovin Sakhua a him leh him loh chungchanga inbeihna a ni tih sawiin, “India ram hi Democracy a ni tawh lo emaw tih tur in kan awm mek tawh a, kan inthlan tur hi a pawimawh hle a, BJP leh a thawhpuite kan thlang tling nih chuan Democracy awm tawh lo ang a, tun inthlan hi tualchhung in beih na nilo a, MLA inthlan ang a Party sawi lova kan hnam, kan ram leh kan sakhua himna kan ngaihtuah a ngai a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar