SDG India Index 2020-21 a Mizoram dinhmun in kawng hrang hrang in hma kan sawn a tilang - Chief Minister

Chief Minister Zoramthanga chuan SDG tehna thar ber, SDG India Index 2020-21 ah Mizoram in dinhmun 12-na a luah ta chuan tan lakna tur tam tak awm mah se State in kawng hrang hrangin hma a sawn tih a tilang chiang hle niin a sawi. 

NITI Aayog-a Sustainable Development Goals (SDGs) buaipuitu Sanyukta Samaddar, Adviser (SDGs) NITI Aayog leh a hoten nimin-a a Pisa-a an kawmna ah Chief Minister Zoramthanga chuan he thu hi a sawi a, mihring damkhawchhuah nan Sustainable Development Goals te chu thil pawimawh tak nia a hriat thu sawiin Chief Minister chuan, heng tehfung atangin tan lakna tur Sector te chiang takin a lang thin a, chumi mai bakah hmasawnna kawng hrang hranga kan dinhmun leh tan lakna tur te State ten kan lo hriain State dangte nena kan tihthat dan kan teh thei a ni, a ti a. SDG tehna hmasa zawk SDG India Index 2019-20 a Mizoram dinhmun chu ram pumah 21-na niin SDG tehna thar berah SDG India Index 2020-21 a Mizoram dinhmun 12-naah a lo chho ta chu lawmawm a tih thu leh tan lakna tur tam tak awm mahse State in kawng hrang hrangin hma a sawn tih chu a lang chiang hle a ni, a ti.

Chief Minister Zoramthanga chuan SDG tehfung hrang hrang leh Sector a hawl te ah hmasawnna awm zel tur chuan State Economy siamthat leh mipuiin hei hi a taka an hlawkpui chu thil pawimawh hmasa nia a ngaih thu a sawi a. Mizoram in hausakna a neih te, a bik takin thing leh mau-a hausakna te chu a tangkai thei ang bera hman dan kawng hrang hrang zawn chu a ngaihpawimawh ber a ni tiin hei hi Central Sawrkar leh NITI Aayog hotute tunhnaia a dawrna ah pawh chiang taka a thlen thu a sawi ai. Sik leh sa inthlak danglam mek kawngah khawvel ram changkangin an buaipui tn Carbon Trading lamah India in a taka hma a lak vat a tul thu pawh Chief Minister chuan a sawilang a ni.

Nimin a he inkawmna ah hian Chief Minister kawmtute hian SDG a tehfung hrang hranga ram pum leh State dangte tehkhina Mizoram dinhmun chungchangah te; Hmarchhak District te SDG zirchianna, Mizoram District dinhmun chungchangah te leh NITI Aayog in rethei tehna tehfung, Below Poverty Line (BPL) thlakna tur, tehfung thar an duan – National Multi Dimensional Poverty Index, Baseline Report-a Mizoram dinhmun chungchangah te presentation an nei a. Mizoram tih thatna leh hmalak tulna Report atanga a lan dan te an sawizau bawk a ni.

SDG Index 2019 ah khan Mizoram in Score 56 hmuin dinhmun 21-na a luah a, SDG Index 2020-ah Score hi 68-ah sang chho in Mizoram dinhmun chu State hrang hrang te zingah 12-na a ni a. NITI Aayog in SDG chungchanga Hmar-chhak District 120 atanga 103 an zirchianah Serchhip leh Lunglei District chu SDG sanna District 10 zingah an tel pha a ni.

National Multi Dimensional Poverty Index, Baseline Report a tarlan danin India rama mirethei (Multi Dimensionally Poor) za zelah 25 vel an awm a, Mizoram-ah chuan hei hi za zelah 9.80 a ni a. Lawngtlai leh Mamit District-ah te chuan he tehfung hi za zela 30.50 leh 25.29 a ni.

NITI Aayog Adviser in presentation a pekah hian Mizoram in tan a lakna tur Sector hrang hrang leh thil dang pawimawh te a sawilang a. Chungte chu SDG-a Goal 9 – Industry, Innovation and Infrastructure leh Goal 15 – Life on Land te nia tarlan a ni a. Hei bakah hian ei leh bar nutrition chungchang leh Hmeichhia te dinhmun, a bik takin an hri-selna siamthat chungchanga tan lakna tur te, zirna chungchang a bik takin zirna sang zawka Gross Enrolment Ratio tlahniam nia langte leh zirtirtu trained a tam thei ang ber neih a tul thu tarlan a ni bawk.

Comments

Popular posts from this blog

Volleyball S/F khel dawn