Mizoram Governor leh MYC Chairman ten MYC hmalakna hrang hrang an sawidun

Mizoram Governor Hari Babu Kambhampati leh Mizoram Youth Commission (MYC) Chairman Dr. Vanlaltanpuia te chu nimin khan Raj Bhavan-ah inkawmin Mizoram thalaite’n hna hmuhna leh eizawnna atan thiamna an neih theihna tura MYC hmalakna te bakah ngaihtuahna thar nena hmalak dan turte an sawi dun.

He hunah hian MYC Chairman chuan Mizoram thalai te tana MYC kalpui a nih dan te, tunhnaia an hlawhtlinna te bakah MYC din a nih dan te a sawi hmasa a. Hemi hnu hian Donny Lalruatsanga, Secretary, MYC chuan kum 2020 leh 2021 inkara MYC hmalakna hrang hrang leh hlawhtlinna te Powerpoint hmangin a tarlang a ni.

Heng report hrang hrang ngaihthlak a nih hnu hian Governor chuan MYC hlawhtlinna leh hmalakna hrang hrang te chu tha a tih thu sawiin, tuna MYC hmalakna piah lamah Mizoram thalaite tana tangkai tur nia a hriat Skill Development Ministry hnuaia Scheme tha tak tak te a sawi a, MYC leh LESDE lam hotuten heng te hi an bawhzui chak a ngai a ni, a ti. MYC chuan thalaite eizawnna kawng kawhmuh kawnga a thawk tha thawkhat nia a hriat thu Governor chuan sawiin, training pek mai duh tawk lovin MYC chuan training nei zo tawh te hna zawn sak (placement) kawngah te pawh chak zawkin hma la chhunzawm zel se a duh thu a sawi bawk.

He hunah hian MYC Chairman chuan MYC chu thalai te tana din a nih angin a thawh tur bik pawh tuksak ni lo mahse thalaite tana khawvel thar siamna leh tih hmasawnna kawngah chuan a inrawlh thei deuh vek tih a sawi a. Lehkhathiam hna hmulo te tana thawh tur zawn sak leh thiamthil zirtir mai ni lovin, thalai lehkha thiam sang lo te tan hlei hlei MYC chuan tan a la nasa a ni, a ti a. Hrileng karah pawh MYC chuan thalaite khawvel thar siam kawnga an hmalakna te an chawlhsan lova, nitin mi hnena hnathawk a eizawng te tana thiam thil Mistiri hna, Sipai tang duhte an tlin ngei theihna atana lo tahhriam, thalai zaithiamte chawikanna project atanga IAS leh Central Sawrkar hnuaia hna hrang hrang atana inziaktling tura thalaite tahhriamte te thlengin a thawk kawp vek a ni, a ti a. Mizo thalaite theihna nasa zawka haichhuah a nih theihna turin training na tur hmun – Aizawl-ah Youth Centre and Office-cum-Coaching Centre, Lunglei-ah Youth Centre, Serkawn-ah Incubation and Skill Training Centre leh Serchhip-ah Youth Centre te sak mek a ni a. Heng bakah hian District tinah Skill Development Training Centre siam turin proposal pawh Ministry-ah thh luh a ni tawh tih a sawi a. Ministry lamah he rawtna thehluh tak te hi pawm a nih theih nan Governor chu hmalak pui turin a sawm nghal bawk a ni.