Directorate of Health Services Building hawng

Directorate of Health Services Building sak thar, MINECO a mi chu nimin khan Health Minister Dr. R. Lalthangliana chuan a hawng.

Directorate of Health Services Building hawnna ah hian Health Minister chuan COVID-19 hrileng karah Department Building sak zawh theih a ni leh hawnna buatsaih a ni chu lawmawm a tih thu a sawi a. Covid boruak rit tak karah Department chuan hma a sawn zel tih sawiin, AYUSH Department tan building sak vat a nih dawn thu leh, District paruk ah Hospital tih changtlun a ni dawn thu sawiin, heng District 6 zinga District pathum ah khum 50 awmna leh District pathum dangah khum 50 aia tam awmna buatsaih a ni ang tih a sawi a. Central Sawrkar Ministry nen pawn inbe pawpin chak taka hmalak mek a ni a, State Matching Share ngailo in heng hmasawnna hrang hrang te hi neih a ni dawn a, thawktute hlawh bakah a chhung cheina tur an rawn tum vek tur thu Minister hian a tarlang a. Kolasib, Mamit leh Serchhip District Hospital tih changtlunna pawh bawhzui mek a nih thu a sawi bawk.

Directorate of Health Services Building hi Infant Mortality Rate hniam avanga 13th Finance Commission atanga pawisa State sawrkar in a dawn atangin leh CSS atanga kum 2016 - 2017 inkar leh kum 2019 - 2020 inkar a sum hmuh belhkhawma sak a ni a. A vai a sum hmuh belh khawm hi cheng nuai 820 a ni. TBL Architectural Consultants, Khatla Aizawl in a sak hna hi August ni 8, 2017 khan an tan a. August ni 8, 2020 a zawh fel tura beisei a nih laiin, COVID-19 avangin duh angin hna a chak theilo a, December ni 20, 2021 khan zawh a ni a, Building ah Floor thum awmin, basement pahnih a awm a ni.

He hun hi Health Secretary R. Lalramnghaka chuan kaihruaiin Khualzahawm Health and Family Welfare Development Board Vice Chairman Dr. Z.R Thiamsanga pawhin Directorate of Health Services building thar chuan hnathawhna boruak tha leh inkungkaihna leh thawhhona tha tak thlen zel se tiin a lawmpui thu a sawi bawk.