Covid avanga Health Care bill la theilo ten an lak thuai theih nan hmalak mek a ni

Health Minister Dr. R. Lalthangliana chuan Health Care chungchangah Covid vanga bill la theilo pawh an lak thuai theih nan hma an la mek tih a sawi.

Nimin a MNF Party in Aizawl Mizo Hnam Run-a Chhung Inkhawm an neih ah Health Minister Dr. R. Lalthangliana chuan SEDP-a an programme pawimawh tak pakhat chu Health Care a ni tih sawiin, “Kan sawrkar kum khatna atangin kan kalpui tan a, chhungkaw khat tan cheng nuai hnih kan kalpui mek,” a ti a. Covid vanga bill la theilo pawh an lak thuai theih nan hma an la mek tih sawiin, “Covid hrileng karah SEDP pawh kan kalpui chho tan dawn mek ta a ni,” a ti bawk.

Health Minister chuan kum 2 dawn lai Covid kan buaipui ta tih sawiin, sawrkarna chelhtu tan pawh a hautak tih a sawi a, “Sawrkar hnathawk leh thawk lo, Kohhran, NGO, Task Force hrang hrang te, Media-te thlengin kan tanhona a tha a. Omicron kan tih pawh hi Mizoram-ah a awm lovin kan la hria a, a lo awm tawh mai thei bawk. Covid hian khawvel ram dang pawh a khawih buai nasa a, mi an thi ruih ruih a, keini pawhin kan tuar nasa ta a nih hi,” a ti a. Sawrkar angin tan an la zual zel dawn tih sawiin, “Kohhranho leh mimal tinte kan tawngtaina hi Lalpa'n a hria ang tih ka ring a, min chhanchhuak ngei ang. India ramah Sample test-ah a titha ber kan ni a, 140% kan in-test tawh a, State dangah chuan 10% hnuai lamte an test a ni,” a ti bawk.

Sawrkar in hri leng dona kawnga hma a lakna hrang hrangte pawh Health Minister chuan sawiin, RT-PCR Van pawh a function thuai dawn thu leh Lunglei-ah RTPCR mai ni lo, natna dang dang atan pawha tangkai tur Laboratory changtlung tak an nei thuai dawn tih a sawi a, Oxygen Plant pawh District zawng zawngah an bun fel vek tawh thu leh a function deuh vek tawh tih a sawi.

Zemabawk-ah JAICA nen thawk dunin Cancer Super Speciallity Hospital cheng vbc. 500 man din tura hma an lak mek thu Minister chuan sawiin, “Zemabawk-a Cancer Hospital kan neih saah Cancer hemna pawh a function tawh a. District tinah Emergency-a admit-na turin Trauma Centre kan bun dawn a ni. Sub-Centre zawng zawng hi Health & Wellness-ah kan upgrade vek dawn a, 80% chu kan zo tawh a ni. Sub-Centre awm lohnaah kuminah hian Health Clinic dah vek kan tum bawk a ni,” a ti a. “Primary Health Care hi kan ngai pawimawh a, Hospital, PHC leh Sub-Centre-te tihchangtlun nan cheng vbc. 280 World Bank Poject atangin State dang tih theih loh kan kalpui mek bawk a ni,” a ti bawk.