Mizoram-a hri kai nuai 1.6 aiin an tam ta

Pathianni khan Mizoram-ah Sample 1977 enfiah niin heng atang hian COVID-19 hri kai mi 495 hmuhchhuah an ni a, Sample enfiah atanga chhut chuan za zela 34.10 zetin hri kaiin Mizoram hri kai nuai 1.6 an tling ta.

Pathianni khan Mizoram-a RT-PCR Laboratory atangin Sample enfiah a awm lova, Fluorescent Immunoassay Test hmangin Aizawl-ah Sample enfiah pahnih awmin hri an kai ve ve a, District hrang hranga TrueNat Laboratory-ah Sample enfiah a awm lo bawk a ni.

Hetihlai hian Rapid Antigen Test hmangin Siaha, Champhai leh Khawzawl tihloh District dang zawngah Sample 1251 enfiah a ni thung a, heng atang hian hri kai mi 493 hmuh niin an zinga 383 te chu Aizawl District-a hri kai hmuhchhuah an ni a, Kolasib leh Mamit District-ah hri kai mi 28 ve ve hmuh niin Saitual District-ah 22, Lunglei District-ah 20, Serchhip District-ah 7, Lawngtlai District-ah 3 leh Hnahthial District-ah hri kai mi pahnih hmuh an ni bawk.

Nimin khan Mizoram-ah hri kai enkawl dam 982 awm belh lehin heti hian Mizoram-a hri kai hmuhchhuah chu 1,60,148 an tling ta a, an zinga 1,51,081 te enkawl dam ni tawhin za zela 94.34 te enkawl dam an ni tawh a, hri kai enkawllai 8481 la awmin mi 586 an boral tawh a ni.