Latest News

Pangkhua ah SAGY bultanna hun hman a ni

Sansad Adarsh Gram Yojana (SAGY) Model Village atana Member of Parliament (Rajya Sabha), K. Vanlalvena’n a thlan Pangkhua ah nimin khan Lawngtlai DC Dr. Andrew H. Vanlaldika hovin a bultanna neih a ni.

Pangkhua Community Hall-a he hun hmanna ah hian Dr. Andrew H. Vanlaldika chuan Model Village bul tanpuia hawngin, Pangkhaw mipuite chu Model Village-a thlan a nih ang taka hna thawh a nih theih nan rilru-a lo inbuatsaih tur leh khaw dangte tana entawn tlak nih tum turin a chah a, khawtlang hmasawn nana inlungrualna leh rinawmna vawng nung tlat turin a fuih a ni.

SAGY Model Village bultanna hun hi Lawngtlai DRDA Project Director Marilyn Rualzakhumthangi, SAGY Charge Officer ni bawk chuan a kaihruai a, chawhnu lamah Lawngtlai District-a sawrkar Department hrang hrang atanga mi thiamte leh Sangau BDO hovin khawtlang hruaitute puala SAGY Model Village chungchang zirhona 'Orientation Programme' hman chhunzawm a ni a. SAGY Model Village thil tum te, a ngaih pawimawh bik thil te leh tihhlawhtlin a tum te, Model Village te'n an kalpui theih hma lakna hrang hrang te, a hmanrua leh a kalpui dante bakah Village Development Plan chungchangte uluk takin zirtir an ni a. Line Department aiawh kalkhawmte leh Pangkhaw mipuite, VC leh tlawmngai pawl te nen Pangkhaw tana hamthatna tur sawihona (interaction) hun hman  a ni bawk.

Pangkhua hi Rajya Sabha MP K. Vanlalvena'n SAGY Model Village atana a thlan niin, a tirah Phase-IV a awm a ni a. Kumin hian Phase-VIII ah dah a ni leh ta zawk a ni.

Comments

Popular News (Last 30 Days)