Chanchin thar lawrkhawm :

Chief Minister in hmanpui

Mizoram Police kum 50 tlin lawmna nimin a Aizawl Vanapa Hall-a neih chu Chief Minister Zoramthanga chuan khuallian niin a hmanpui a, Mizoram Police in kum 50 hmel a hmu ta chu ropui a tih thu leh State kan nih hnu leh remna leh muanna kan neih hnuin Mizoram Police pawh lo thang chhoin kawng tinrengin hma a sawn zel chu lawmawm a tih thu a sawi bawk. Mizoram Police hnuaiah hian post hrang hrang 12,206 awmin chung zinga 8381 chu hnawhkhah a ni a, Range 3 awmin Police Sub-Division 18, Police Station 43, Police Outpost 13 a awm mek a ni. Mizoram Police hnuaiah hian Mizoram Armed Police Battalion 3 leh India Reserve Battalion 5 an awm a, kum 50 chhung hian Police te hian hnathawh that lawmman hrang hrang leh Medal, 417 dawng tawhin ram tana nunna hlan mi 56 an awm tawh bawk a. Police zingah Covid-19 vei 1969 awmin, mi 12 an boral tawh a ni.

Supply Minister in hawng

Supply Minister leh Kolasib bialtu MLA K. Lalrinliana chuan MLA Fund hmanga sak zawh Meidum-a Community Hall leh Meidum Volleyball Association leh VC tangkawp a sak Volleyball Court te chu nimin khan a hawng a, Sawrkar atanga puihna awm ang angte khawtlang rotling neih nana tangkai ta a Meidum khaw-tlangin an hmang chu lawmawm a tih thu sawiin, Sawrkar puihna bak a anmahni phak tawk a thahnemngai taka an chêi chhunzawm dan te chu fakawm a tih thu a sawi bawk. Supply Minister hian Tlawng lui luangin lei a lak avanga Bairabi hmun thenkhata harsatna thleng thin chu a hmun ah enin kum 1970 atang khan Tlawng lui in lei a lak avang hian In 80 vel a chhe tawh a ni.

Hmachhawp thlirhona nei

ICT Ministe Robert Romawia Royte hovin nimin khan Aizawl-a SAD Conference Hall-ah ICT Department leh a kaihhnawih Department hotuten IT hmasawn nana ICT Department hma-lakna te leh hmachhawp mekte thlirhona an nei.

MPCC in sawrkar an phut

Assam sawrkar tirh, Police in Aitlang, Vairengte ram leh ramri  dep khaw hrang hranga chhungkaw tam tak innghahna leh eizawnna atana an hman mek ram zau tak an rawn hnehchhuh tak avanga harsatna awm mek chu a rang thei ang bera chinfel sak thuai turin MPCC chuan sawrkar an phut tih an sawi.

Science Congress zofel

Science Teacher's Association, Mizoram (STAM) leh Samagra Shiksha, Mizoram buat-saih State Level Children's Science Congress vawi 29-na Aizawl-a neih chu nimin khan zo-felin Project 16 atangin National Level-a tel tur 8 leh Indian Science Congress-a tel tur 2 thlan a ni.

Champhai-ah sumdawnna hmun khar a ni

Mizoram sawrkar in Champhai District Bawrhsap sawn tura thupek a lo tihchhuah tawh sut leh phuta NGO Coordination Committee te hmalakna in nimin khan Champhai-a sumdawnna leh dawr hrang hrangte chu khar a ni a, NGO Coordination Committee ngenna hi mipui ten an thlawp that avangin dawr khar hi nimin chhun dar 12:00 khan tihtawp a ni. Champhai NGO Coordination Committee hi Vawiin hian thukhawm lehin an kal zel dan tur an sawiho leh dawn nia thudawn a ni a, hetah hian sawrkar in Mizoram-a DC thenkhat sawn te Republic Day hmaa insawn rihlo tura thuchhuah thar a siam chu an sawiho rin a ni.

MZP General Hqrs. in thutkhawm an nei

Mizo Zirlai Pawl (MZP) General Hqrs. chuan nimin khan Aizawl a MZP Office-ah Executive Committee thutkhawm neiin zirlai leh thalai tam tak te harsatna leh natna vei mek HIV/ AIDS chungchang inzirtirna, zirlaite zingah kalpui tha an ti a. Mizoram zirna In sang ber Mizoram University (MZU) a thawktu tur lak ah dik tak leh a tling ngei lak an duh rualin a tling leh thiam rau rauah a ram leilungfa Zofate duhsaka, a tam thei ang ber an luh theih nan hmalak an rel bawk.