Revenue Deptt. inhlantharna Minister in hmanpui

Land Revenue & Settlement Department chuan nimin khan Aizawl-a an Department General Conference Hall-ah kumthar atana inhlanna hun hmangin Revenue Minister Lalruatkima chuan a hmanpui a ni.

Nimin a he hun hmanna ah hian Revenue Minister chuan kum kalta chhung khan hripui leng karah Revenue Department chuan remhre taka ruahmanna an siam avangin hna khaihlak lutuk lova an kal thei chu a lawmawm takzet tih a sawi a. Revenue Department chu chhung tin mamawh leh a tel lova awm theih loh, chhungkaw tin file/document kawltu department a nih avangin file vawn that leh document vawnhim chungchangah mawh nasa takin a phur tih sawiin, hemi kawngah hian a chhunga thawkte chu neitu an ni tih hria a, an mawhphurhna theuha tan la thar leh turin a fuih a. Department rawn dawrtute hi naupang lam aiin upa lam nu leh pa te a tam zawk an nih thin avangin dawhtheihna leh hawih hawmna nena lo dawr zel turin a ngen bawk.

Revenue Minister chuan LR&S Department hnuaiah dan leh hrai, Rules leh Act chungchangah hriattur tam tak a awm thu sawiin, thawktute chu intuaihriam leh theuha tan la zelturin a chah bawk a. Technology hmang tangkai thiam apiang an vannei tih hria a, hmasawn tum zel turin a chah bawk.

He hunah hian Minister chuan Land Revenue & Settlement chungchanga mipuite hriattur pawimawh leh awmhmun atanga department dawr dawna thil tul te inhrilhhriatna ‘Awareness Video Clip’ a tlangzarh nghal bawk a ni.