KVK hmalakna tura ruahmanna pawm a ni

Zirtawpni khan KVK Scientific Advisory Committee (SAC)  thutkhawm vawi 12-na chu biak hmuh theihna hmanga neih a ni a, kumthar atana KVK Serchhip District hmalakna tur leh kum kaltaa an hmalakna te thlirho a ni.

He thutkhawm hi James Vanlalluaia, Additional Director (R&E Wing), Directorate of Agriculture chuan kai-hruaiin Dr. T. Vanlalngurzauva, Senior Scientist & Head, KVK Serchhip District, N. Vanlaiphai in kum 2021-a KVK hmalakna hrang hrang leh Department hrang hrangte nena thawhhona an neih dan te a lem nen a entir a ni.

Hemi hnu hian KVK-a Subject Matter Specialist hrang hrang – Agronomy, Horticulture, Animal Science, Agriculture Engineer, Home Science leh Agriculture Extension ten tun kum thara an hmalakna tura an duan (Annual Action Plan) theuh sawizauna leh kalpui an tum dan sawifiahna hun an hmang bawk a. Zawhfiah duh leh hriatchian duh an neih te inzawhfiah a nih hnuah kumin atana ruahmanna leh hmachhawp an neih te chu SAC hian a pawmpui vek a ni.

SAC thutkhawm ah hian Joint Director (R&E Wing), Directorate of Agriculture, Deputy Director & Nodal Officer, KVK (R&E Wing), Directorate of Agriculture bakah Serchhip District atang DAO, DVO, CVO, Project Director DRDA, ATMA hotute, DHO aiawh, BHO, E. Lungdar Block, KVK Progressive Farmer bakah KVK Staff te an tel tha hle.