Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin lawrkhawm :

CM hovin Board thukhawm

SEDP Horticulture Development Board chu nimin khan an Chairman leh Chief Minister Zoramthanga hovin a Pisa-ah an thukhawm a, he thutkhawm ah hian an hmalak zel dan tur sawiho in COVID-19 hrileng avanga duh anga hmalak theih anih loh thu leh harsatna an tawh te sawi niin, chuti chung chuan ke pen zel theihna turah tih theih awm apiangah te theihtawpa hmalak zui zel ni se an ti a. Mizoram-a tha leh hlawkthlak taka thar theih hrang hrang Horticulture product lo chhawpchhuah tawhte thlirhoin, bung hrang hrang a target siam dan turte an sawiho a ni.


Republic Day boycott tum

Champhai-a tlawmngai pawl hrang hrangte chuan sawrkar-a an thilphut tih hlawhtlin a nih loh chuan tun thla ni 26-a Republic Day lo thleng tur boycott an tum thu an sawi. Champhai DC sawnchhuak lo tura sawrkar an ngenna ah an huntiam chhunga a hlawhtlinna an hmuh tak loh avangin nimin khan Champhai-a NGO hrang hrang te hi thukhawm lehin an thilphut nawrna atan tun thla ni 21 khian Champhai khawpui chhunga Dawr zawng zawng khar nise an ti a, hemi hnua ala hlawhtling lo zel a nih chuan January 24-ah kawng zawhin 25-ah Sawrkar Pisa zawng zawng khar lehin January 26-ah Total Bandh huaihawt bakah Republic Day boycott nise an ti a. Hemi hnua DC sawnna tur sut ala nih loh chuan na zawka hmalak a nih tur thu pawh sawiin, an thil-ngiat te hi Champhai District mipui tan a ni tih hriaa hma lakpui turin Champhai District chhunga MLA te an phut thu pawh an sawi bawk.


Mobile RT-PCR Van peih tawh

Health Minister Dr. R. Lalthangliana chuan Mizoram ta tur Mobile RT-PCR Van (I-Lab) chuan Mizoram a rawn thlen tawh thu sawiin, Company Engineer ten an endik fel tawh thu leh rokhawlhna dang a awm loh chuan Vawiin chhun ah Union Minister for Science & Technology Dr Jitendra Singh-a’n internet kaltlanga a vailiam tur thu a sawi.


Zirlai in Offline-a Class kal duh

MZP General Hqrs. hruaitute leh College Students’ Union hruaitute chuan nimin khan Chief Minister Zoramthanga chu a Office-ah hmuin hri leng avanga College zirlai ten Online hmang chauha Class an kal chu zirlaite hmakhua tur ngaihtuahin Final Semester tal chu Offline a Class kal tir turin a ngen a, Mizoram sawrkar hnuaia College Students’ Study Fund beitham tak chu tipung tura an ngen bakah Higher & Technical Department ah Mizo zirlaite hma ngaia Director atan Mizo ngei dah turin an ngen bawk. Hei bakah hian Rural Development  (RD) Block siam belh turah Vathuam-pui-ah ngei RD Block dah tura ngenin, Thangram Indigenious People’s Movement chungchang te pawh CM hnenah hian an thlen bawk.


MSU Pisa Pui hawnna nei

Mizo Students’ Union (MSU) General Hqrs. chuan Aizawl-a an Pisa pui, Mizo Zirlaite Rûn chu kumin atana hawnna hun nimin khan an hmang a, he hunah hian an Vice President R.K. Hnuna chuan kum 2022 lo awm turah MSU chuan Zirna in hmasawnna a hmuh zel theihna atan theihtawp a chhuah chhunzawm zel dawn tih a sawi a, Mizo zirlaite-ah Youth Moral Reform chu na takin MSU chuan a kalpui dawn tih sawiin, tuna College kal mekte tan an chhuah huna Central leh State Sawrkar hnuaia hnaruak chungchang an hriatfiah theihna tur leh an lo inbuatsaih lawk theihna atan MSU chuan ruahmanna a kalpui dawn thu pawh a sawi bawk.


MPCC in Sainik School tana sum pe turin ngen

Mizoram Pradesh Congress Committee (MPCC) chuan Chhing-chhip a Sainik School in Mizoram sawrkar atanga School chhung hmunhma chei leh siamthat hna thawhna tur sum an dawn ngai tawh loh thu Governor hnena an sawi chungchangah hetianga School hmasawnna tur hnathawhna tur sum Mizoram sawrkar atanga an dawng tawh lo hi a pawi  em em tih an sawi a, “School hmasawnna in nasa taka a tawrh zui dawn avangin an mamawh ang sum leh pai pe thuai turin Congress Party chuan Mizoram sawrkar a ngen a ni,” an ti bawk.

Comments

Popular News (Last 30 Days)