MJA Serchhip District Annual Conference neiin hruaitu thar thlanna neih a ni

Mizoram Journalists’ Association (MJA) Serchhip District chuan niminpiah, January 25, 2022 khan Serchhip Press Club-ah Annual Conference neiin kum 2022-2024 chhunga hruaitu thlanna an nei.

MJA Serchhip District Annual Conference hi MJA Serchhip District Vice President C. Ramengmawia chuan kaihruaiin he hun hi MJA General Hqrs. President Zonunsanga Khiangte chuan rawn hmanpuiin hri leng kara MJA Serchhip District Annual Conference neih a ni chu lawmawm a tih thu a sawi a, Mizoram pumah MJA Member mi 193 an awm thu sawiin, heng zingah hian tun thlengin COVID-19 hri kai mi 32 an awm tawh thu leh member atanga chhutin zaa 16.58 velin hri kai tawh ang an nih thu a sawi a. Journalist te chu thuthar zawnga hmun hrang hranga kal, mi chi hrang hrang dawrtu an nih avangin hri kai an tam pawh thil mak a nih loh thu a sawi a, hri kai zingah ICU-a dah leh enkawl ngai an la awmlo erawj lawmawm a tih thu sawiin, “Kan hna hi Pathian in a rawng bawlna ah min pawm sak niin kan hria,” a ti. MJA General Hqrs. President chuan MJA member te chu eizawnna avanga pawl pakhat a awmkhawm an nih avangin khawi District ami te pawhin inpawhna tha tak an neih thu a sawi a, eizawnna avanga intelkhawm an nih ruala iner an awmlo chu a lawmawm lehzual tih a sawi a. Journalist hna chu senior avanga inthlahdah theih a ni lo tih pawh sawiin, thil thleng thar te ngaihtuah a mipuite tana tan an laka an inchherhriam zel a tul thu a sawi bawk.

MJA (SD) Annual Conference hi Serchhip DIPRO K. Saitluanga MIS pawhin hmanpuiin MJA Serchhip District te nen thawhhona tha tak an nei thin chu lawmawm a tih thu a sawi a. Media mi ten hma an sawn theihna atan leh Advertisement pawh tam zawk an hmuh theihna tura hma an lak thin thu te sawiin, chutihrual chuan Media mi ten sum leh pai an um nasat lutuk chuan mipui ten an rinna te pawh a tlakhniam theih zia an hriat reng a pawimawh thu a sawi bawk.

Niminpiah a MJA Serchhip District Annual Conference-ah hian an President Kapliana Pachuau chuan inlawmna thu sawiin, Report hrang hrang ngaihthlak a ni bawk a, chawhnu lamah rorelna leh kum 2022-2024 chhunga hruaitu thlanna neiin President-ah C. Lalhminghlua, Vice President-ah C. Ramengmawia, Treasurer-ah Lalremruata Ralte bakah Executive Members atan - RC. Hranghmingthanga, C. Lalrochhuanga, R. Lalmuansanga, Zonunsanga Kawlni leh RL. Hlupuia te thlantlin an ni.