Thenzawl atanga Doctor sawnchhuah duh lovin Joint NGO Committee in Transfer Order an hal

Thenzawl CHC-a Doctor thawklai sawn tura ruahmanna kal zelah Joint NGO Committee Thenzawl chuan Doctor an neih te a thlakna tur dah tel lova sawnchhuah tumna chu a tawp thlenga dodal zel an tum thu sawiin, Thenzawl-a Doctor sawnchhuahna tura Order tihchhuah chu nimin tlai khan an hal.

Thenzawl CHC-ah hian Doctor thawklai mi pahnih awmin Thenzawl-ah tho hian PTS-ah Doctor pakhat a awm bawk a, tun thla ni 25 khan Mizoram sawrkar chuan Doctor thenkhat te awmna siksawiin hetah hian Thenzawl CHC-a thawklai Dr. Benjamin Malsawmtluanga chu Sialhawk PHC-ah sawn niin PTS Thenzawl-a thawklai Dr. Lalramhluna chu Thenzawl CHC-ah sawn a nih bakah PTS Thenzawl-ah Medical Officer mawhphurhna la tura tih a ni bawk a. Hetianga Doctor sawn tum hi an duh loh thu leh an dodal thu Thenzawl Joint YMA te chuan thuchhuah siam nghalin, Joint VC leh MNF Serchhip West Block, Thenzawl te pawhin thuneitute an dawr nghal a. An thu thlen te a hlawhtling dawn nia an ngaih laiin Sawrkar chuan tun thla ni 28 khan thupek thar siamin, Dr. Lalramhluna hi Sialhawk PHC-ah sawn niin Dr. Benjamin Malsawmtluanga hi Thenzawl CHC-a awm tura tih a nih bakah PTS-ah Medical Officer hna chelh tura tih a ni leh ta a ni.

Hetianga a Order tihchhuah a nih leh hnu Inrinni zan khan Thenzawl Joint YMA huaihawtin Thenzawl khawchhunga NGO hrang hrang- Area MUP, Joint MHIP, MZP leh MSU Sub-Hqrs. bakah YMA Branch hrang hrang aiawh ten Joint Meeting neiin, khawtlang hruaitu ten ngenna an thehluh hnuah pawh an beisei ang ni lova Thenzawl atanga Doctor sawnchhuahna Order ala awm tho chu hriatthiam harsa an ti takzet tih an sawi a. Thenzawl-a Doctor awmsa a thlakna tur dah lova sawnchhuah tumna chu a tawp thlenga dodal zel an tum thu puangin, hmalakna hmasa atan nimin chawhnu dar 2:30 khan Then-zawl Field Veng kawn-ah Doctor transfer order hi an hal ta a ni.

Joint NGO Committee chuan Thenzawl atanga an aiawh tur dah lova Doctor sawnchhuah chu khawtlang mipui ten engtikah mah rem an ti dawnlo tih sawiin, a rang lama Transfer Order sut tura sawrkar an phut thu an sawi bawk.