Kumin chhungin Serchhip District-ah COVID-19 hri kai 2498 hmuhchhuah an ni tawh

Krismas leh kumthar vuakvet zawh hnua Serchhip District-a COVID-19 hri kai hmuhchhuah pung hluai chuan ziaawm lam a pan chho hret hret niin a lang a, tun thla ni 1 atanga niminpiah, January 26 thleng khan Serchhip District-ah Sample 14,845 enfiah ni tawhin heng atang hian COVID-19 hri kai 2498 zet hmuhchhuah an ni tawh a ni.

Serchhip CMO Office atanga thu kan dawn danin kumin January ni 1 atanga tun thla ni 26 thleng khan Serchhip District-a TrueNat Laboratory-ah Sample 298 enfiah niin FIA hmangin Sample 738 leh Rapid Antigen Test hmangin Sample 13,809 enfiah niin Sample enfiah zawng zawng hi 14,845 a ni a, heng atang hian COVID-19 hri kai 2498 hmuhchhuah niin Sample enfiah atanga za zela 16.82 te chuan hri hi an kai a ni. January thla chhung hian hri kai hmuhchhuah tam ber ni chu January 10 khan niin hri kai 256 hmuhchhuah an ni a, Sample enfiah atanga chhuta hri kai hmuhchhuah tam ber ni chu January ni 1 kha niin Sample enfiah 46-ah hri kai 22 hmuh niin Sample enfiah atanga za zela 47.82 in hri an kai a ni.

Nizan hmasa thleng khan Serchhip District-ah hian Sample 65,564 enfiah ni tawhin hri kai 8429 hmuhchhuah an ni a, Sample enfiah tawh atanga za zela 12.85 te chuan hri hi kaiin hri kai enkawllai 503 an awm bawk a, hri kai enkawllai zinga 153 zet chu Thenzawl khua niin Thenzawl PTS-ah hri kai enkawllai 34 an awm bawk a, Serchhip khawpui chhungah hri kai enkawllai 120 an awm bawk a ni.

Serchhip District-ah hian COVID-19 hri kai enkawlna turin khum 10 awmna DCHC awmin CCC pahnih, khum 100 awmna Nursing School CCC leh khum 38 awmna IAH te a awm bawk a, khawtlang in an din 4C pawh 14 a la awm bawk a ni. Serchhip District atanga hri kai hmuhchhuah zingah enkawlna nasa zawk pek ngai te chu ZMC-ah thawn thin niin nimin thleng khan mi 112 te chu ZMC-ah hian refer an ni tawh a, Serchhip atanga ZMC-a refer zingah mi 3 te chu enkawl mek an ni bawk.

Serchhip District-ah hian hri leng avang hian hmun 41 zet chu Containment Zone, Micro-Containment Zone leh Restricted Area-ah puan a ni tawh a, tunah hian Containment Zone-a puan hmun pakhat (East Lungdar) leh Restricted Area-a puan hmun 13 ala awm a ni.