Mizoram ta tur Mobile I-Lab tlangzarh a ni ta

Sawrkar Laipui-a Ministry of Science & Technology in Mizoram tana a thlawna an pek Mobile I-Lab (Infectious Disease Diagnostic Laboratory) chu nimin khan hman theih tura hawn a ni ta.

Mobile I-Lab (Infectious Disease Diagnostic Laboratory) hi Union Minister of State for Science & Technology Jitendra Singh leh Mizoram Chief Minister Zoramthanga te chuan internet kaltlanga hawngin Union Minister of State hian New Delhi atangin a rawn hawng a, Chief Minister hian a Pisa atangin a hawng thung a ni. He hunah hian Chief Minister Zoramthanga chuan Jitendra Singh chu DoNER Minister a nih lai pawha Mizoram duhsaktu a nih thu sawiin, Science & Technology Minister a nih hnu thleng pawha Mizoram a ngai pawimawh thin chu a lawmawm takzet a ni, a ti a. Mizoram mipuite leh Mizoram sawrkar aiawhin Mobil I-Lab kan neih theihna tura hma min laksaktute zawng zawng chungah lawmthu a sawi a. RT-PCR Laboratory pawh Aizawl leh Lungleiah kan neih thu sawiin, District dangah pawh dah tumin ruahman a ni tih a sawi bawk.

Union Minister of State for Science & Technology Jitendra Singh chuan Mizoram in Mobile I-Lab an nei thei ta chu a lawmpui thu sawiin, India hmarchhak chu hmun kilkhawr leh inkalpawh zung zung harsatna hmun a nih avangin anni pawhin an ngai pawimawh tih a sawi a, “A bul tan nan Mizoram kan duhsak hmasa ber a ni,” a ti a. India hmarchhak State te tan Mobile I-Lab tam zawk ruahman chu an ngaih pawimawh berte zinga mi a nih thu a sawi. COVID-19 vanga hmanraw thar kan neihte hi kawng lehlamah chuan malsawmna a ni ve tho tih sawiin, Mobile I-Lab chu COVID-19 a reh hnu pawhin tangkai taka hman chhunzawm zel theih tur a nih thu a sawi bawk.

Mobile I-Lab siamtu AMTZ (Andhra Pradesh MedTech Zone) Ltd., Vishakapatnam Managing Director Dr. JK. Sharma chuan Chief Minister Zoramthanga’n Mobile I-Lab a ngai pawimawh chu anmahni ti tangtu a nih thu sawiin, lawmthu a hrilh a, Mobile I-Lab chu natna inkai-chhawn awlsam chi hrang hrang test theihna tura duan a ni a, RT-PCR sample bakah HIV, TB leh natna dang tam tak a test theih dawn avangin COVID-19 hripui a reh hnuah pawh kawng hrang hrangin a la tangkai dawn chauh a ni, a ti a. Hmun kilkhawr leh chengker zawka chengte tan a tangkai lehzual dawn tih sawiin, nikhatah RT-PCR sample 50 vel a test thei dawn tih a sawi bawk.

Nimin a Mobile I-Lab tlangzarhna hunah hian Health Minister Dr. R. Lalthangliana chuan COVID-19 sample test chungchangah Mizoram chu kan ti tha hle tih sawiin, sample nuai 15 chuang test tawh niin, mihring cheng zat atanga chhut chuan 114% lai a ni tawh tih a sawi bawk.

Comments

Popular posts from this blog

Volleyball S/F khel dawn